Vise-Xefe Bankada KHUNTO, Deputada Olinda Guterres. Imajen/Egas Cristovão

DILI, 26 maiu 2020 (TATOLI)—Bankada Partidu Kmanek Haburas Unidade Nacional Timor Oan (KUNTO), propoin Deputadu António Nobre Tilman okupa kargu Vise-Sekretáriu Meza Parlamentu Nasionál.

Vise-Xefe Bankada KHUNTO, Deputada Olinda Guterres hasoru ona Konselleiru Máximu KHUNTO, José dos Santos “Naimori” hodi husu koñesimentu kona-ba bankada KHUNTO nia pozisaun kona-ba kargu prezidénsia meza parlamentu.

“Horisehik lokraik ami kandidata António Nobre Tilman ba iha Vise-Sekretáriu Meza Parlamentu Nasionál nian. Orsida ami sei enkamiña rekerimentu ba iha meza Prezidente Parlamentu nian. Kargu Segundu Vise-Prezidente sei mantein ho Luís Roberto. Ha’u mak okupa kargu Xefe Bankada KHUNTO nian no ha’u kandidata forte (calon terkuat) ba Prezidente Komisaun D (Ekonomia no Dezenvolvimentu),” Deputada Olinda Guterres, informa ba jornalista sira, iha resintu Parlamentu Nasionál, tersa ne’e.

Nia dehan, Deputadu António Nobre Tilman durante ne’e nu’udar Xefe Bankada Partidu KHUNTO iha Parlamentu Nasionál, no kona-ba Sekretáriu Meza Parlamentu nian ne’e hosi FRETILIN nafatin.

“Kona-ba Sekretáriu Meza Parlamentu nian ne’e hosi FRETILIN, deputada Lídia Norberta, tanba ami ne’e satu komandu,” nia hateten.

Maibé, nia dehan, oras ne’e foka de’it eleisaun ba sekretáriu no vise-sekretáriu hafoin haree fali komisaun espesizalida sira tanba buat sira-ne’e loos hotu no hein implementa de’it.

“Maibé ne’e, klaru, loos hotu ona. Hein implementa de’it,” Vise-Xefe Bankada KHUNTO ne’e hateten.

Jornalista : Evaristo Soares Martins

Editór      : Cancio Ximenes

1 KOMENTÁRIU

HAKEREK NO HATÁN

Please enter your comment!
Please enter your name here