Osan Dolar Amerika. Imajen/Google

DILI, 26 maiu 2020 (TATOLI)-Governu Austrália liuhosi ninia Embaixadór iha Timor-Leste, Peter Roberts, tersa ohin, asina nota kooperasaun ida ho Ministra Finansa en ezersísiu, Sara Lobo Brites, hodi entrega apoiu orsamentu millaun $ 4.6 ba Programa Nasionál Dezenvolvimentu Suku (PNDS).

Suku 150 maka sei sai benefisiáriu husi apoiu ne’e hodi hari’i infraestrutura bázika hanesan irigasaun, bee moos, klínika no seluk tan.

Atuál Vise Ministra Finansa, Sara Lobo Brites, informa apoiu ne’e hodi aselera prosesu dezenvolvimentu liliu kontrusaun infraestrutura bázika ne’ebé paradu durante kazu COVID-19 iha Timor-Leste.

“Ohin ha’u rasik mak asina akordu ida ho Embaixadór Australáia hodi fó apoiu ba PNDS, osan ne’e transfere direita ba konta bankaria PNDS nian hodi redúz nia prosesu administrativu bele iha efisiénsia liliu iha pandemia COVID-19 ne’e,” katak Sara Lobo Brités, iha edifísiu Ministériu Finansa, Ai-Tarak-Laran Dili, tersa (26/05/2020).

Iha fatin hanesan Embaixadór Austrália iha Timor-Leste, Peter Roberts, afirma sente onradu tanba bele fó apoiu ba PNDS.

“Sente kontente tebes tanba ohin bele asina akordu ho Governu Timor-Leste hodi fó apoiu ba programa PNDS, tanba ita haree ba Coronavirus fó impaktu bo’ot tebes ba ekonomia,”dehan Diplomata Austrálianu ne’e.

“Liuhosi programa PNDS bele suporta komunidade no forñese oportunidade ba komunidade sira hodi hetan servisu,”tenik tan.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here