Imajen/Facebook MAE.

DILI, 26 maiu 2020(TATOLI)–Ministru Administrasaun Estatál ein-Ezersisiu, Abilio José Caetano, horisehik (segunda, 25 miu 2020), hala’o despedida no husik hela lia-tatoli bá Administradór no Prezidente Autoridade Munisípiu sira no kargu xefia sira kompostu hosi Dretór Jerál no Diretór Nasionál sira iha Ministériu Administrasaun Estatál (MAE).

“Ita-boot sira kontinua servisu ho profesionalizmu nafatin ho Ministru foun ne’ebé sei mai bainhira de’it. Hanesan ajente de estadu sempre fó nafatin ita-nia kontribuisaun no ita nia esperiensia ba sé de’it mak presiza. Maski iha dezafiu nia laran durante fulan 23 hamutuk ho imi, lidera Ministeriu ne’e ho imi-nia apoiu no didikasaun tomak, ita la’o hamutuk iha ámbitu VIII Governu nian konserteza iha susesu balun ita halo ona iha mós servisu balun ita sedauk atinje. Maski nune’e, Ministru foun ne’ebé sei mai bele kontinua nafatin servisu sira ba oin,” dehan Abilio José Caetano iha serimónia despedida ne’ebe Ajénsia TATOLI asesu liuhosi Ministériu da Administrasaun Estatál (MAE) nia fanpage facebook, tersa ne’e.

Nia hatutan, maske durante fulan 23 ita hamutuk no lidera Ministeriu ne’e, iha buat balun ke nia la halo di’ak ruma, hanesan ema husu deskulpa no nia deseizu nafatin atu kontinua servisu di’ak ho Ministru foun ne’ebé sei mai.

Imajen/Facebook MAE.

Entretantu, iha serimónia despedida ne’e, Administradór sira no Prezidente Autoridade Munisípiu sira, Direitores Nasionál sira espresa sira-nia sentimentu orgullu no triste. Tanba ne’e, sira hatoo agradese ba Ministru ein-ezersisiu MAE nia lideransa tomak durante ne’e, lidera sira iha situasaun ne’ebé Governu kuaze enfrenta hela impase politika ne’ebé ho tempu naruk kuaze povu tomak mós sente.

Aleinde halo despedida ho Administradór sira hosi Munisipius, nia mós dirije Administradór ho Direitór Nasionál sira kontinua Koordena servisu hamutuk ho MSSI ba sosializasaun diploma ministeriál nian ba iha nivel Postu Administrativu no to’o baze, relasiona ho kriteria sira ba pagamentu subsídiu $100 ba kada uma-kain hosi Governu.

Ministru Administrasaun Estatál ein-Ezersisiu, Abilio José Caetano, hatama ona ninia karta rejignasaun ba Primeiru-Ministru, Taur Matan Ruak, iha segunda (25 maiu 2020) horisehik hodi kumpre orientasaun partidu CNRT nian maka tenke retira hosi VIII Governu Konstitusionál ne’ebé lideradu hosi Taur Matan Ruak.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here