Prezidente Parlamentu Nasionál, Aniceto Longuinhos Guterres Lopez.

DILI, 25 maiu 2020 (TATOLI)—Prezidente Parlamentu Nasionál, Aniceto Longuinhos Guterres Lopez, hateten mudansa prezidénsia sira iha Parlamentu Nasionál nu’udar ezersísiu atu hakotu impase polítiku iha rai-laran.

“Mudansa prezidénsia ne’ebé ita hala’o ne’e nu’udar nesesidade atu halo ajustamentu ho dinámika polítika foun no ezersísiu atu hakotu impase polítiku,” Aniceto Longuinhos Guterres Lopez informa liuhosi plenária, Parlamentu Nasionál, segunda ne’e.

Prezidente Aniceto Longuinhos Guterres Lopez hatutan, órgaun hanesan Parlamentu Nasionál tenke funsiona nafatin tanba órgaun ne’e reprezenta povu.

“Mudansa ida-ne’e mós ejizénsia ida atu evita ka kontra tentativa balu atu harii situasaun hapara vida institusionál Parlamentu Nasionál nian, evita krize institusionál iha Parlamentu Nasionál, ne’ebé mak la haree interese nasaun no povu nian,” nia hateten.

Nia haktuir, mudansa prezidénsia ne’e tanba ba loron ohin sei halo eleisaun ba sekretária meza no vise-sekretária parlamentu nian ne’ebé durante ne’e xefia hosi bankada CNRT no UDT/FM.

Prezidente Parlamentu Nasionál, Aniceto Longuinhos Guterres Lopez prezide plenária ba loron ohin akompaña hosi Vise-Prezidente Parlamentu Nasionál, Deputada Maria Angelina Sarmento Lopes, Segundu Vise Parlamentu Nasionál, Deputadu Luis Roberto no Vise-Sekretária, Deputada Regina Freitas.

Hosi reprezentante Governu nian partisipa hosi Sekretáriu Estadu Komunikasaun Sosiál (SEKOMS), Mericio Akara.

Notísia Relevante: Ohin, PN Hala’o Eleisaun ba Kargu Sekretáriu no Vise-Sekretáriu Meza

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here