Ministru Obra Públika, Salvador Eugênio Soares dos Reis Pires. Imajen Tatoli/Egas Cristovão

DILI, 25 maiu 2020 (TATOLI) – Ministériu Obra Públiku (MOP) halo ona identifikasaun provizóriu ba obra Estadu hamutuk 28 ne’ebé hetan estragu husi inundasaun hafoin udan boot iha loron 21 no 22 maiu iha parte Leste no Kosta Súl.

Ministru Obra Públika, Salvador Eugênio Soares dos Reis Pires, fó kedan orientasaun ba Diresaun Jerál Obra Públiku (DGOP, sigla portugés) no Unidade Jestaun Projetu (PMU, sigla inglés) hodi halo normalizasaun atu fasilita movimentasaun transporte públiku no privadu.

“Ami indetifika ona estragu estrada, ponte, rede bee inklui eletrisidade ho totál lokalizasaun hamutuk 28 no ekipa sei kontinua halo identikasaun iha parte Leste no Kosta Súl,” tenik Ministru Salvador hafoin enkontru ho Primeiru-Ministru, Taur Matan Ruak, iha Palásiu Governu, segunda ne’e.

Notísia Relevante: MOP-Empreza CBMI Normaliza Provizóriu Ponte Weru-Koco Lautém

MOP Normaliza Ona Estrada Koneksaun Manatuto-Natarbora

Ministru ne’e adianta, ekipa tékniku husi DGOP no PMU kontinua halo indentifikasaun ba obra sira ne’ebé hetan estragu hodi halo estimasaun ba orsamentu no halo rekuperasaun.

“Depende ba orsamentu tanba millaun $5 ba kraik ita lori ba Konsellu Administrasaun Fundu Infraestrutura (KAFI) atu halo desizaun no ita-nia parte legál haree katak projetu balun presiza duni emerjénsia tuir rejime jurídiku aprovizionamentu ita halo rekuprasaun hafoin normalizasaun hotu”, nia akresenta.

Tuir Governante ne’e, obra ne’ebé grave liu mak ponte Weru-Koco iha Lautém no estrada dirasaun Manatuto-Natarbora inklui fatin balun,  maibé daudaun ne’e ekipa hala’o ona normalizasaun.

“Primeiru-Ministru orienta ita tenke mobiliza rekursu hotu, liuliu ekipamentu pezadu husi Intitutu Jestaun Ekipamentu (IGE, sigla portugés) ba parte Súl no Leste atu halo normalizasaun”, nia salienta.

Dausaun ne’e, DGOP no PMU aprezenta ona lokalizasaun no mapamentu ba estragu husi inundasaun no sei kontinua verifika dadus atu bele kuantifika no bele avansa ba rekuperasaun iha tempu badak.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here