Airnorth to’o iha Aeroportu Internasionál Prezidente Nicolau Lobato, Comoro. Imajen Tatoli/António Gonçalves

DILI, 25 maiu 2020 (TATOLI) – Governu Timor-Leste no Airnorth iha loron 7 abríl deside selebra kontratu ligasaun aéreu atu garante konektividade iha situasaun emerjénsia nia-laran no sei halo operasaun semana ida dala-tolu, enkuantu kustu operasaun bá-mai dala ida husi Darwin-Dili hamutuk $15.000.

Ministru Transporte no Komunikasaun, José Agostinho da Silva, rejeita informasaun ne’ebé espalla iha públiku katak Airnorth tula sasán privadu husi individuál balun.

“Ne’e la loos. Ita tenke haree kontratu, tanba kontratu ne’e Estadu Timor-Leste halo atu atende nesesidade emerjénsia de’it relasiona ho surtu COVID-19 ne’e, la’ós kontratu komersiál ka ema selu fali atu tula nia materiál privadu”, tenik Ministru José Agostinho iha Palásiu Governu, segunda ne’e.

Notísia Relevante: Reseita Husi Airnorth Sei Oferese ba Governu Timor-Leste Durante Kontratu Vigora

Ho nune’e, Ministru ne’e dehan nia koloka ona ninia parte tékniku hodi sempre tau matan iha Aeroportu Comoro bainhira Airnorth tun.

“Ha’u nia tékniku sira iha terrenu dehan katak to’o agora Airnorth la tula sasán privadu tanba objetivu kontrata ne’e atu halo atendimentu nesesidade emerjénsia ba Estadu liga ba asuntu COVID-19 nia, kontratu la’ós liga ba komersiál ka ema atu aluga fali,” katak Governante ne’e.

Nia adianta, ekipa tékniku Autoridade Navegasaun Aériu Timor-Leste (ANATL) no Aviasaun Sivíl sira relata katak foin lalais Airnorth tula ekipamentu médiku husi nasaun Nova Zelándia hodi fó ba Ministériu Saúde no mós sasán seluk liga ho servisu Governu nian.

“Iha mós sasán balun husi servisu postál ninian, hanesan haruka karta sira ne’e mai inklui membru Polísia Nasionál Timor-Leste (PNTL) hamutuk na’in-11 ne’ebé tuir treinamentu iha Austrália antes implementasaun Estadu Emerjénsia mak fila ona mai”, nia akresenta.

Nia afirma, kontratu ho Airnorth atu halo atedimentu ba nesesidade emerjénsia hanesan transporta ekipamentu médiku, ai-moruk ka bainhira iha espesialista saúde ruma maihusi rai li’ur bainhira situasaun surtu COVID-19 ne’e grave bele tula uza aviaun autralianu ne’e.

“Ha’u husu ba públiku labele fásil fiar rumoris mak iha, maibé tenke fiar informasaun ne’ebé akuradu no realístiku, inklui realiadade atubele fó konfiasaun nafatin ba Airnorth halo atendimentu iha períodu defísil ida-ne’e”, nia salienta.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here