Koordenadór Jerál Sekretariadu Konsellu Jestaun Fundu COVID-19 no atuál Diretór Jerál Orsamentu Estadu Ministériu Finansa, Januário da Gama. Imajen Tatoli/Egas Cristovão

DILI, 25 maiu 2020 (TATOLI) – Konsellu Jestaun Fundu COVID-19 liuhosi reuniaun iha Ministériu Finansa (MF), Aitarak-laran, segunda ne’e, aprova ona lista pagamentu suplementu remuneratóriu husi instituisaun hamutuk lima.

“Konsellu Jestaun aprova ona lista pagamentu husi instituisaun hamutuk lima ho montante orsamentu pur volta millaun $22-resin. Ida-ne’e ba iha Gabinete Primeiru-Ministru (GPM), Ministériu Saúde (MS), Polísia Nasionál Timor-Leste (PNTL), FALINTIL-Forsa Defeza Timor-Leste (F-FDTL), no Sentru Lojístika Nasionál (CLN, sigla portugés)”, relata Koordenadór Sekretariadu Konsellu Jestaun Fundu COVID-19, Januário da Gama, hafoin ramata enkontru.

Atuál Diretór Jerál Orsamentu Estadu MF ne’e esplika, orsamentu millaun $22 ne’ebé aprovadu, téknikamente bele halo ona transferénsia ba konta bankária kada instituisaun, ne’ebé pedidu detallu sei maihusi instituisaun sira atu halo transferénsia, enkuantu hirak ne’ebé sei hein prosesu aprovizionamentu bainhira konklui mak halo pagamentu depende lista ne’ebé konsellu aprova ona.

Notísia Relevante: Governu Aprova Suplementu Remuneratóriu ba Profesionál Liña Frente Kada Loron $25

“Suplementu remuneratóriu ne’e alokasaun orijinál iha tiha ona, maibé ami halo revizaun fali tanba alokasaun ne’e ultrapasa tiha kalkulasaun ne’ebé haktuir iha diploma subsídiu remuneratóriu ne’ebé mak foin daudaun hasai. Entaun ami hasai balansu ne’e atu aloka fali ba pagamentu subsídiu uma-kain no estudante naun bolseiru”, dehan Januário.

Nune’e, planu ministériu sira nian tuir kálkulu kada ema $50 loron ida, maibé diploma kona-ba suplementu remuneratóriu foin daudaun fó sai la to’o montante ne’e.

“Konsellu Ministru aprova montante $25, $20 no $15, entaun Konsellu Jestaun ajusta fali ho kustu foun ne’ebé mak iha diploma ministeriál. Tanba ne’e hetan tiha poupansa”, nia akresenta.

Entretantu, iha reuniaun Konsellu Jestaun ne’e mós halo aprovasaun ezekusaun ne’ebé semana kotuk Ministériu Negosiu Estranjeiru no Kooperasaun (MNEK) aprezenta ona, relativamentu ho pagamentu ba estudante naun bolseiru iha estranjeiru.

“Lista sira ne’ebé MNEK haruka mai ho proposta adisionál, presiza mós hetan ninia apoia ruma. Tanba ne’e Konsellu Jestaun rezolve hotu ona no hetan ona aprovasaun”, nia salienta.

Tuir Koordenadór ne’e, Sekretariadu Tékniku sei halo alterasaun no hein MNEK atu aprezenta pedidu detalladu ba Konsellu Jestaun, hafoin Dekretu Lei kona-ba pagamentu subsídiu ne’e hetan promulgasaun hosi Prezidente Repúblikac, maka Sekretáriu Téniku bele halo ona transferénsia ba konta MNEK nian.

Enkuantu atu halo alterasaun ba orsamentu ne’e, nesesita delega kompeténsia ba Sekretariadu Tékniku atu halo alterasaun.

“Hahú aban, Sekretariadu Tékniku sei halo alterasaun no halo aprovasaun iha sistema hodi bele guia ona ezekusaun, liuliu ba pagamentu subsídiu uma-kain no pagamentu subsídiu ba estudante naun bolseiru iha estrajeiru”, nia subliña.

Antes ne’e, Governu liuhosi reuniaun Konsellu Ministru estraordinária iha loron 5 maiu, aprova rezolusaun ne’ebé aprezenta husi Ministra Finansa interina, Sara Lobo Brites kona-ba suplementu remuneratóriu ba profesionál sira ne’ebé durante ne’e dedika sira nia-an hodi halo prevensaun ligadu ho surtu COVID-19 iha Timor-Leste.

Montante ne’ebé prevee iha rezolusaun ne’e aloka iha MS no fahe ba kategoria tolu no aplika ba profesionál sira ne’ebé konsidera iha liña frente, ne’ebé montante $25 kada loron ba kategoria dahuluk, ba sira ne’ebé servisu iha fatin izolamentu no laboratóriu, $20 ba sira ne’ebé servisu iha kuarentena no mós $15 ba sira ne’ebé serbisu administrativu ka sira ne’ebé apoiu maibé laiha kontaktu direta.

Enkuantu ba motorista, forsa, defeza, imigrasaun, kuarentena, alfándega, no sira ne’ebé servisu iha no fronteira, aeroportu, portu kada loron $15, ba pesoál agua no saneamentu, elétrisidade, limpeza, seguransa sivíl, no pesoál sira rekolla lixu kada loron $5.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here