Aviaun Filipina ne’ebé atu repatria sidadaun na’in-72 to’o ina iha Aeroportu Comoro, segunda (25/05). Imajen Tatoli/António Gonçalves

DILI, 25 maiu 2020 (TATOLI) – Aviaun Filipina, Pan Pacific ne’ebé atu repatria sidadaun na’in-72 iha loron kinta (21/05) maibé kansela tanba seidauk hetan autorizasaun espasu aérea husi parte autoridade Indonézia, to’o ona iha Aeroportu Internasionál Prezidente Nicolau Lobato, Comoro tuku 13:00.

Ministru Transporte no Komunikasaun, José Agostinho da Silva, konfirma nia parte simu ona informa katak Aviaun Filipina sei repatria sidadaun hirak ne’e husi Timor-Leste.

“Hau simu ona informasaun no konfirmadu ona katak Aviaun Filipina sei mai tula sidadaun sira husi estrajeiru iha Timor-Leste ba sira-nian rai no aviaun sei tun tuku ida”, dehan Ministru José Agostinho da Silva ba Agência Tatoli iha Palásiu Governu, segunda ne’e.

Notísia Relevante: Aviaun Filipina Kansela Mai Dili Tanba Seidauk Hetan Autorizasaun Aérea Husi Indonézia

Sidadaun hirak ne’e kompostu husi Filipina na’in-57, Korea na’in-sanulu, Japaun na’in-haat no Amérika na’in-ida.

Governu liuhosi Autoridade Navegasaun Aéreu Timor-Leste, Empreza Públika (ANATL, EP) iha loron sábadu (04/04) deside suspende provizóriu operasaun komersiál internasionál husi nasaun li’ur hodi evita propagasaun surtu COVID-19.

Maski nune’e, haree ba nesesidade iha situasaun emerjénsia nia laran, Governu Timor-Leste liuhosi Ministériu Transporte no Komunikasaun (MTK) deside selebra akordu ho Airnorth, ne’ebé sei permite operasaun aéreu sira entre Dili no Darwin atu tula ekipamentu médiku relasiona ho COVID-19.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here