Ministru Transporte no Komunikasaun, José Agustinho da Silva. Imajen Tatoli/Egas Cristovão

DILI, 25 maiu 2020 ( TATOLI) – Ministru Transporte no Komunikasaun, José Agostinho da Silva, informa, iha tersa (26/05) aban, aviaun husi nasaun Xina sei transporta ekipamentu médiku husi Xina mai Timor-Leste.

“Ha’u simu informasaun husi Ministériu Saúde katak aban aviaun ida husi Xina sei mai Timor-Leste hodi transporta ekipamentu médiku nian”, dehan Ministru José Agostinho ba Agência Tatoli iha Palásiu Governu, segunda ne’e.

Governante ne’e adianta, nia parte ladún hatene sasán saida de’it maka aban aviaun ne’e sei lori mai.

“Ha’u hanoin kona-ba ekipamentu saida maka aviaun sei lori mai, Ministériu Saúde maka hatene. Maibé ein prinsípiu ha’u atu dehan dei’t katak ita preparadu ba kualkér saida de’it, kona-ba sasán COVID-19 ita prepara simu”, nia akresenta.

Iha sorin seluk, Inspektór Jerál Ministériu Transporte no Komunikasaun, Jacinto Freitas, hateten  nia parte hasoru ona Ministru José Agostinho ohin dader hodi ko’alia kona-ba kestaun transportasaun ekipamentu saúde.

“Ohin dader Ministru bolu hodi ko’alia kona-ba asuntu aban nia, tanba aviaun ida husi Xina sei transporta ekipamentu médiku husi Xina mai Timor-Leste”, Jacinto salienta.

Tuir nia, ekipamentu ne’ebé maka aban sei transporta husi Xina mai Timor-Leste maka hanesan máskara, luvas no sasán esensiál sira seluk.

Maske nune’e, parte  Autoridade Avisaun Sivíl Timor-Leste (AACTL, sigla portugés), sei hasai aprovasaun voo husi aviaun ne’e.

“Orsida ami fila sei prepara flight approval ba aviaun husi Xina ne’ebé sei voo mai Timor-Leste aban”, dehan Jacinto Freitas.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here