Lider Karizmátiku, Kay Rala Xanana Gusmão, rei avó feto na’in-tolu nia liman bainhira fó apoiu sasán nesesidade báziku iha Aldeia Karau-Maten, Suku Ai-Lok, Postu Administrativu Kristu Rei, Munisípiu Dili, domingu (24/05/2020). Imajen/Eugénio Pereira

DILI, 24 maiu 2020 (TATOLI) – Komandante Ein-Xefe FALINTIL, Kay Rala Xanana Gusmão, hato’o agradese boot ba konfisaun relijioza (Katólika, Musulmanu, Budista no Hindu) ho uma-lisan sira hotu iha territóriu nasionál ne’ebé organiza malu halo misa hodi harohan ba Maromak no  ba uma-lisan sira ne’ebé fanu lulik sira hodi satan propagasaun Coronavirus ka COVID-19.

Notísia Relevante : Xanana ho Key Fó Apoia Solidariedade ba Família Ne’ebé Susar Liu iha Susar Nia-Laran

Lider karizmátiku ne’e konsidera COVID-19 ne’ebé hahú ataka povu Xinés iha dezembru 2019 hodi hada’et ba mundu tomak halo ema barak mate no barak sofre, tanba ne’e, presiza ema hotu nia pasiénsia no domin boot hodi izola-aan iha uma no kumpre regra jerál saúde nian.

Eis Xefe Estadu ne’e dehan, Timor-Leste país ki’ik ida ne’ebé viziñu ho país ASEAN sira, liu-liu nasaun belun di’ak Indonézia rejista pasiente COVID-19 rihun no balun mate, maibé iha Timor-Leste rejista de’it pasiente na’in 24 ne’ebé rekupera hotu ona nu’udar grasa ida husi Aman Maromak no forsa natureza nia tulun.

“Ita agradese sorte Maromak ajuda ita, tanba ita bispu, na’i padre  sira no Igreja sira hotu iha Timor, ita reza husu tulun no ita katuas sira mós halo rituál husi forsa natureza tulun ita, tanba corona ne’e la’ós hanesan denge no malaria, tanba corona ne’e nia problema mak hada’et lalais liu halo ema mate barak iha mundu,” hateten Xanana Gusmão, domingu (24/05/2020),  bainhira halo asaun solidariedade hodi fahe sasán nesesidade báziku ba abitante 300 husi Suku Ai-Lok, Postu Administrativu Kristu Rei, Munisípiu Dili.

Xanana dehan, iha Timor-Leste mezmu sofre COVID-19 la rejista ema ruma mate, maibé tristeza boot liu maka moras dengue ataka no númeru boot halo labarik barak mate.

“Ita nia problema maka denge halo ita nia oan sira mate, ida ne’e nu’udar problema ida, ita tenke haree,”  Xanana hateten.

Nia  husu atu povu sira kumpre nafatin regra jerál saúde nian hodi ida-idak kuidadu-aan atu evita propagasaun surtu COVID-19 iha komunidade nia leet. Nune’e, Xanana husu ba povu atu badinas hamoos fo’er iha uma ninin, iha bairru ida-idak hodi labele fó fatin ba virus no moras.

Iha oportunidade ne’e, Xanana husu ba povu sira kontinua hato’o solidariedade hodi agradese ba domin boot ba ekipa Profisionál Saúde ne’ebé hamriik iha liña oin fó-aan serbisu kalan-loron tau matan no kura pasiente sira ne’ebé sofre COVID-19 too rekupera.

Sala Situasaun Sentru Integradu Jestaun Krize (SS-CIGC, sigla Portugés) halo serbisu konta husi loron 21 marsu 2020, deteta kazu COVID-19 konfirmadu pozitivu husi sidadaun estranjeiru na’in-ida (1) no sa’e to’o kazu konfirmadu pozitivu ba ema na’in 24 no provavel na’in-haat  (4) iha loron 24 abríl 2020.

Jornalista     : Eugénio Pereira 

Editór            : Francisco Simões

HAKEREK NO HATÁN

Please enter your comment!
Please enter your name here