Ministru Obra Públika, Salvador Eugênio Soares dos Reis Pires bainhira halo enkontru ho ekipa ADB via telekonferénsia, iha sesta (22/05). Imajen/Mídia-MOP

DILI, 24 maiu 2020 (TATOLI) –  Ministru Obra Públika, Salvador Eugênio Soares dos Reis Pires, iha sesta (22/05) ne’e, realiza enkontru via telekonferénsia ho Country Director Banku Dezenvolvimentu Aziátiku (ADB, sigla inglés), Sunil Mitra ho ekipa iha Kuartél Jerál Manila, Filipina.

Iha enkontru ne’e, Ministru Salvador ko’alia kona-ba preparasaun Governu Timor-Leste nian liuhosi Ministériu Obra Públika (MOP), hamutuk ho Ministériu Finansa (MF) atu aselera prosesu preparasaun konstrusaun estrada trosu rotunda Prezidente Nicolau Lobato, Comoro to’o iha inter-seksaun Tibar nian (seksaun 1,  naruk hamutuk kilómetru 1,9).

“MOP husu ADB nia apoiu atu utiliza balansu (saldu) husi fundu impréstimu ba projetu sira ne’ebé iha hodi finansia ba estrada refere ne’ebé estratéjiku tebes ba Timor-Leste tanba fasilita no sei hasa’e mobilidade ema no sasán, liuliu relasiona ho operasionalizasaun Portu Baía Tibar nian iha tinan-2021”, refere nota imprensa ne’ebé Agência Tatoli, domingu ne’e.

Estrada Rotunda Comoro to’o Tasi-Tolu kuaze kilómetru rua hamutuk ho pakote estrada trosu Tibar to’o Tasi-Tolu ne’ebé responsável husi obra ne’e maka kompañia internasionál, China Wuyi ho kustu obra millaun $12-resin.

Obra ne’e rasik, hahú ona iha loron 28 fevereiru 2017 to’o tuir planu sei ramata iha outubru 2019, maibé tanba situasaun atuál maka obra ne’e adia.

ADB sei haree dokumentu sira ne’ebé Governu Timor-Leste submete ona no sei haruka sira-nia péritu mai vizita Dili hodi analiza no avalia prosesu preparasaun.

ADB mós konsiente katak projetu ne’e importante tebes, maibé tanba de’it pandemia COVID-19 maka sei dada tempu oituan atu avalia didi’ak ba pedidu Governu Timor-Leste nian.

MOP mós fó hanoin katak Governu iha ona akordu ho kompañia ne’ebé agora daudaun halo konstrusaun ba Portu Baía Tibar, katak estrada refere tenke finaliza iha fulan-agostu 2021.

Bainhira estrada seidauk finaliza tuir akordu, Governu Timor-Leste sei hetan multa no selu osan lubuk ida ba kompañia ne’ebé halo konstrusaun ba Portu Tibar.

Iha enkontru ne’e, MOP hetan akompañamentu husi Diretór Jerál Obra Públika, Rui Hernani Freitas, inklui Diretór Jerál, António Freitas, husi MF.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here