Matebian Bonifaçio Sanches ‘Rony’ ne’ebé lafaek tata mate iha lagoa Ira-Lalaro, área Malahara, suku Muapitine, Postu Administrativu Lautém, iha sábadu (23/05). Imajen/Espesiál

DILI, 24 maiu 2020 (TATOLI) – Komunidade sira hetan ona mate isin Bonifaçio Sanches ho idade 27, ne’ebé lafaek tata mate iha lagoa Ira-Lalaro, área Malahara, suku Muapitine, Postu Administrativu Lautém.

Lafaek tata matebian iha sesta (23/05), iha tuku 11:30 dader, hafoin kail ikan no durante loron ida tomak mate isin iha bee laran.

“Ami foin hetan ita-nia kolega nia mate isin iha tuku 19:30 kalan ne’e no ita-nia kolega nia mate isin lori ona ba ninia rezidénsia hodi halo seremonia fúnebre”, tenik matebian nian kolega, Olderito de Jesus ba Agência Tatoli, domingu ne’e.

Notísia Relevante: Lafaek Tata Mate Ema Ida iha Lagoa Ira-Lalaro

Nia salienta, mate isin konsege hetan tanba esforsu maka’as husi komunidade no matebian nia kolega sira.

Matebian ho naran bolu Rony, husi Aldeia Rei-Soru, Suku Home, Postu Administrativu Lospalos-Lautém, hanesan kaben-na’in no iha oan na’in-ida.

Tuir dadus, kazu lafaek tata mate ema iha lagoa Ira-Lalaro la’ós ba dahuluk maibé antes ne’e tata mate ona ema hamutuk 10-resin no ema na’in-tolu mak lafaek tata kanek de’it.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here