Imajen Espesiál.

DILI, 24 maiu 2020 (TATOLI)—Bankada Parlamentár komposta hosi Frente Revolusionária Timor-Leste Independente (FRETILIN), Partidu Libertasaun Populár (PLP) no Kmanek Haburas Unidade Nasionál Timor-Oan (KHUNTO) apresia ho aktu polítiku Eis Prezidente Parlamentu Nasionál, Arão Noé de Jesus da Costa Amaral, tanba hato’o rekerimentu ba Tribunál Rekursu hodi husu lejitimidade kona-ba eleisaun ba prezidente foun, Aniceto Guterres.

Vise-Xefe Bankada FRETILIN, Deputadu Francisco Branco, haktuir iha Loron-22 fulan-maiu tinan-2020, Prezidente Tribunal Rekursu hato’o despaixu ida ba Parlamentu Nasionál hodi husu órgaun ne’e fornese informasaun detallu balu relasiona ho prosesu destituisaun ne’ebé deputadu sira halo hasoru Prezidente Parlamentu sesante, Deputadu Arão Noe Amaral no eleisaun ba Prezidente Parlamentu foun, Deputadu Aniceto Longinhos Guterres Lopes.

Tuir nia, Prezidente Tribunal Rekursu nia despaixu ida-ne’e relasiona ho rekerimentu ida-ne’ebé deputadu Arão Noé Amaral hatama ba Tribunal Rekursu hodi husu fiskalizaun ba konstitusionalide ba prosesu destituisaun.

“Bankada Parlamentár PLP, FRETILIN no KHUNTO apresia áktu polítiku deputadu Arão Noe Amaral lori rekerimentu ba fiskalizasaun ba Tribunal Rekursu. Maski ami mós lamenta tanba áktu ida-ne’e nia hala’o hafoin deputadu sira hosi ninia bankada rasik komete tiha ona hahalok krime iha sala plenária nia laran, to’o baku fila meza prezidente parlamentu nasionál nian ne’ebé hamosu preokupasaun hosi públiku no entidades oin-oin,” ddehan Vise-Xefe Bankada FRETILIN, Deputadu Francisco Branco, liuhosi komunikadu imprensa ne’ebé Agência TATOLI asesu, domingu ne’e.

Deputadu Bankada FRETILIN ne’e konsidera aktu politiku ne’e tenke halo atu hatudu maturidade polítiku no atu fortifika ita-nia demokrasia.

“Deputadu sira iha Parlamentu Nasionál presiza atu banati tuir povu nia komportamentu, nee’ebé hakmatek hala’o sira-nia moris ho normalidade maske sira-nia reprezentante sira iha Parlamentu Nasionál hatudu hahalok ne’ebé la’ós ezemplu di’ak,” Deputadu Francisco Branco akresenta.

Aleinde ne’e, Xefe Bankada PLP, Francisco de Vasconcelos hateten se deputadu Arão Noe lakohi atu lori deputadu sira komete áktu sira-ne’ebé povu Timor-Leste tomak akompaña no kestiona, ne’ebé akontese iha loron-18 no loron-19 fulan-maiu tinan 2020, di’ak liu nia lori kedas keiza hasoru pedidiu destituisaun antes karik di’ak.

“Dívia nia lori kedas keixa hasoru pedidu destituisaun hasoru nia ne’e ba Tribunál antes,” Xefe Bankada PLP, deputadu Francisco de Vasconcelos hatutan.

Entretantu, Vise-Xefe Bankada KHUNTO, Deputada Olinda Guterres apresia komportamentu polítiku deputadu Arão Noé nian hodi entrega gabinete, rezidénsia ofisiáll no sasán sira prezidente parlamentu nasionál nian ba prezidente parlamentu foun, maske nia rasik sei hein desizaun finál hosi tribunál rekursu ba pedidu fiskalizasaun ne’ebé nia hatama.

“Tuir ami-nia hanoin tuir loloos hahú kedas iha rekerimentu destituisaun hasoru nia ne’e, nia koopera antes karik laiha disturbiu no estraga sasán sira ne’e,” Deputada Olinda Guterres hateten.

Komunikadu imprensa ne’ebé relata hosi bankada parlamentár tolu (3) ne’e apresia ho hahalok polítiku deputadu Arão Noé nian. Maibé, la taka dalan ba keixa kona-ba abuzu podér ne’ebé Deputadu Arão Noé komete hodi viola rejimentu parlamentu nasionál nian liuhosi rejeita atu ajenda votasaun ba pedidu destituisaun, ne’ebé tuir loloos tenke ajenda obrigatoriamente iha loron lima (5) nia laran bazeia Rejimentu Parlamentu Nasionál (RPN) artigu 16-B, hodi atu koko blokeia funsionamentu normál Parlamentu Nasionál nian.

Tuir RPN artigu 16-B (Hasai husi kargu) alíena 1 esplika, bele hasai Prezidente hosi ninia kargu liuhosi votasaun ho eskrutíniu sekretu, ne’ebé hala’o iha sesaun plenária no iha sesaun ne’e Deputadu sira-ne’ebé prezente tenke liu metade hosi sira-ne’ebé kaer duni funsaun.

Alínea 2 hosi artigu ne’e hateten, pedidu atu hasai nia hosi kargu sei aprezenta ho justifikasaun apropriada, iha rekerimentu ne’ebé pelo menos Deputadu na’in sanulu (10) subskreve no nia votasaun tenke ajenda obrigatoriamente ba sesaun plenária ne’ebé sei hala’o iha loron lima nia laran.

Alínea 3 hosi artigu ne’e mós dehan, hasai hosi kargu ne’e sei aprova ho votu hosi maioria absoluta hosi Deputadu sira-ne’ebé kaer duni funsaun. Alínea 4 hosi artigu ne’e fundamenta, desizaun hasai hosi kargu sai efetivu kedas.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here