Diretór Operasaun AIFAESA, Gabriel da Costa. Imajen Tatoli/Egas Cristovão

DILI, 22 maiu 2020 (TATOLI)Diretór Operasaun Autoridade Inspesaun no Fiskalizasaun Atividade Ekonómika Sanitária no Alimentár, Institutu Públiku (AIFAESA,IP), Gabriel da Costa, informa durante implementasaun Estadu Emerjénsia (EE) faze dahuluk, AIFAESA submete keixa  hamutuk 14 ba Ministériu Públiku (MP).

 “Estadu Emerjénsia dahuluk, ami prosesa kazu hamutuk 20 iha Dili de’it la inklui iha Baucau no husi kazu hirak ne’e, kazu hamutuk 14 maka hatama ona ba Ministériu Públiku”, dehan Dirijente ne’e ba Agência Tatoli iha ninia knaar fatin, Villa Verde, sesta ne’e.

Nia adianta, kazu ne’ebé AIFAESA prosesa hodi submete ba MP, kuaze ho tipu ne’ebé komete hasa’e folin sasán nesesidade báziku a’as durante implementasaun EE.

“Husi kazu hirak ne’e, maiora husi loja fa’an sasán hanesan maskára ho folin a’as inklui sasán sira seluk, nune’e mós ho loja no farmásia sira ne’ebé fa’an nesesidade bázika hanesan mina, foos”, nia haktuir.

Tuir Diretór ne’e, kona-ba koema ba kestaun hasa’e folin presiza haree didi’ak tuir lei 24/2017 iha situasaun COVID-19 no EE bainhira operadór ekonomia inventa sasan, tanba aktu ne’e konsidera hanesan krime, maibé ninia koema tenke bazeia lei 24/2017.

“Situasan COVID-19 no Estadu Emerjénsia, ema hotu hela iha uma nune’e mosu loja no farmásia balun hasa’e folin, liuliu ami-nia kontrolu detekta katak folin foos no máskara sira hasa’e folin. Ida-ne’e krime, tanba ne’e ami hamutuk ho Polísia Nasionál Servisu Investigasaun Kriminál (PNSIK) halo apreensaun ba loja sira“, nia akresenta.

Nia konsidera, prátika aproveitamentu hasa’e folin sasán, hatodan maluk seluk no ida-ne’e krime.

“Ba aktu ne’e rasik sei tama kadeia tinan tolu ka selu multa $1.000 to’o $30.000. Tanba konsidera krime ami tenke submete iha parte Ministériu Públiku, nune’e bele hatutan ba Tribunál hodi deside dehan empreza ne’e komete krime ka lae, entaun aplika koema no posibilidade bele tama kadeia”,nia subliña.

Entertantu, iha períodu EE faze daruak, AIFAESA simu reklamasaun hamutuk 12 iha Dili.

“Durante Estadu Emerjénsia daruak, buat hotu ami kontrola ho di’ak no sasán nesesidade báziku husi operadór ekonomia sira la hasa’e folin,  maibé ami simu reklamasaun 12  ne’ebé la’ós ba kazu folin nesesidade bázika maibé iha kompañia ne’ebé oferese hahan iha kuarentena ne’ebé dalaruma a’at, balun ular iha laran no agora daudaun ami-nia parte jurídiku hala’o hela prosesu ba kazu ne’e rasik”, Gabriel salienta.

Iha mós keixa husi konsumidór husi supermekadu xinez balun iha parte Manleuna, ne’ebé maka fa’an ikan dodok.

“Prosesu sira ne’e, parte AIFAESA husi Departamentu Operasaun submete ona ba parte juríku atu haree”, nia realsa.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here