Adjuntu Sekretáriu Jerál CNRT, Jacinto Rigoberto. Imajen/ Egas Cristóvão

DILI, 23 maiu 2020 (TATOLI) – Komisaun Polítika Nasionál Partidu Congresso Naçional de Recontrução de Timor-Leste (CPN-CNRT) dezmente ho rumoris ne’ebé mosu dehan, partidu ne’ebé lidera husi Komandante Ein Xefe das FALINTIL, Kay Rala Xanana Gusmão,  atu mobiliza masa hodi halo manifestasaun hasoru Presidente Repúblika, Francisco Guterres “Lú Olo” iha loron 28 maiu 2020.

Notísia Relevante : 25 Maiu, Loron Ikus ba Membru Governu CNRT Sai husi Governu

Adjuntu Sekretáriu Jerál no Sekretáriu Jerál Interinu Partidu CNRT, Jacinto Rigoberto, mós deklara hodi rejeita informasaun ne’ebé dehan, CNRT atu lori malae sira ne’e afetadu husi surtu coronavirus ka COVID-19 mai Timor – Leste.

“CNRT nu’udar partidu ida ne’ebé hatuur ho prinsípiu no regra, hakaruk ba Konstituisaun RDTL, tane aas valores  demokrasia nian, ezerse toleránsia no étika, hodi serve povu no nasaun hodi afirma  katak, rumoris sira-ne’e falsu, la loos, laiha fundamentu,” afirma Jacinto Rigoberto, sábadu (23/05/2020), liuhusi konferénsia imprensa iha Sede Nasionál partidu CNRT, Bairru Grilos, Dili.

Jacinto Rigoberto hatutan, CNRT envolve-aan maka’as kedas dezde inísiu propagasaun surtu COVID-19 iha  Timor-Leste, liuhusi nia Prezidente Partidu, Kay Rala  Xanana Gusmão rasik ho vontade pesoál no dedikasaun tomak ajuda inisiativa governu nian atu bele fó resposta imediata ba nesesidade, hanesan fatin ba kuarentena no izolamentu iha Vera Cruz, no konsege husu apoiu ka doasaun ekipamentu husi Governu Xina atu responde ba fasilidade ne’ebé Timor-Leste presiza hodi luta kombate COVID-19.

Ho razaun sira ne’e, CNRT dezmente, rumoris hotu ne’ebé, dehan katak, CNRT sei lori malae sira ne’ebé infetadu mai husi li’ur, CNRT hein katak instituisaun kompetente atu bele hala’o avaliasaun konkreta, no objetiva kona-ba situasaun COVID-19 nian ho nia impaktu ba mobilizasaun ekonómika povu nian iha tempu ida-ne’e.

CNRT fó apoiu nafatin ba kontrola másimu iha serbisu fronteira nian, kontinua apoiu mós ba serbisu iha izolamentu karik iha, no mós mekanizmu atu garante teste ne’ebé di’ak liu ba sidadaun ne’ebé karik deteta iha sintoma COVID-19.

CNRT sempre apela ba nia membru sira tomak, hahú husi estrutura nasionál to’o baze, atu kontribui ba pás no dezenvolvimentu, kumpre prinsípiu ne’ebé estipuladu iha TL nia Konstituisaun no lei sira, atu garante pás no estabilidade nasionál, atu promove nafatin dezenvolvimentu no bem-estar komún.

CNRT fiar nafatin ba instituisaun kompetente Estadu nian ba matéria Seguransa no Defeza atu bele buka tuir informasaun sira ne’ebé espalla iha komunidade nia-leet, hodi hatene loloos autór ba rumoris sira-ne’e no hola medida tuir regra no lei ne’ebé vigora.

Jornalista     : Eugénio Pereira

Editór            : Francisco Simões

HAKEREK NO HATÁN

Please enter your comment!
Please enter your name here