Ministru Ensinu Superiór, Siénsia no Kultura, Longuinhos dos Santos. Imajen /Egas Cristovão

DILI, 22 maiu 2020 (TATOLI)-Ministru Ensinu Superiór Siénsia no Kultura (MESSK), Longuinhos dos Santos informa reuniaun interministeriál iha sesta ohin, la konsege aprova data atu re-ativa prosesu aprendijazen ba estudante pre-eskolár to’o universidade sira.

Enkontru ne’e lidera diretamente husi Primeiru-Ministru Taur Matan Ruak iha salaun Xanana Gusmão, Ministériu Finansa, Ai-Tarak-Laran Dili.

Nia dehan, Ministru Sira liuhusi reuniaun Konsellu Ministru, iha kinta (21/05/2020) mós seidauk deside kona-ba extensaun ka hapara ona implementasaun Estadu Emerjénsia.

Governu hasai desizaun tarde maka afeta mós ba Ministériu Edukasaun Juventude no Desportu no Ministériu Ensinu Superiór Siénsia no Kultura (MESSK) atu re-ativa funsionamentu eskola sira iha territóriu Timor-Leste.

“Ita hein hele desizaun final husi Konsellu Ministru kona-ba atu hakotu ka kontinua estadu emerjénsia,”dehan Nia hafoin ramata enkontru ne’e ohin.

Iha fatin hanesan Ministra Edukasaun Juventude no Desportu, Dulce Jesus Soares, hateten seidauk bele foti desizaun kona-ba planu re-ativa prosesu aprendijazen ba estudante sira tanba seidauk deside iha konsellu ministru.

Entertantu, implementasaun estadu emerjénsia sei ramata iha loron 27 fulan-maiu 2020.

Jornalista : Tome Amado

Editór       : Agapito dos Santos 

HAKEREK NO HATÁN

Please enter your comment!
Please enter your name here