Luis Roberto, Deputadu Bankada KHUNTO

DILI, 22 maiu 2020 (TATOLI)—Deputadu atuál Segundu Vise-Prezidente Parlamentu Nasionál, Luis Roberto, propoin ba bankada parlamentár tolu (3) komposta hosi FRETILIN, PLP no KHUNTO atu halo komunikasaun ho bankada Congresso Nacional da Reconstrução de Timor (CNRT) no União Democrática Timorrense-Frente Mudança (UDT/FM) molok halo mudansa ba sekretária meza no vise-sekretária meza.

Deputadu Luis Roberto informa, karik iha mudansa ba sekretária meza, vise-sekretária meza no prezidente komisaun sira presiza halo komunikasaun ho bankada hotu-hotu iha Parlamentu Nasionál.

“Tuir KHUNTO nia haree, ita presiza haree lai hodi liga ho bankada CNRT nian ne’ebé mak durante ne’e asume sekretária meza no mós bankada UDT/FM mós asume kargu nu’udar vise-sekretária. Tanba ne’e, ita presiza halo komunikasaun ho sira, mantein ka halo mudansa, ita presiza halo komunikasaun. Tanba tempu to’o ona ita koopera hamutuk, halo mudansa radikál ba parlamentu mós ladún di’ak. Labele dehan FRETILIN, KHUNTO no PLP mak domina buat hotu iha parlamentu ida-ne’e, ne’e KHUNTO lakohi,” dehan Deputadu Luis Roberto ba jornalista sira iha resintu Parlamentu Nasionál, sesta ne’e.

Nia fó hanoin, Bankada tolu (3) komposta hosi FRETILIN, PLP no KHUNTO presiza halo komunikasaun ho bankada CNRT no bankada sira seluk sira hakarak mantein ka lae.

“Se lakohi mantein, bele halo mudansa. Karik sira hakarak mantein nafatin nu’udar sekretária meza, ha’u fiar katak sira mós bele responsabiliza ba sira-nia kna’ar ne’ebé mak iha,” nia dehan.

Nia afirma, bankada KHUNTO ho kadeira lima (5) de’it maibé la’ós ho palataforma entendimentu ne’ebé foun muda buat hotu-hotu tuir maioria parlamentár nia hakarak.

“Ha’u-nia hakarak ne’e haree mós ba maluk sira-ne’ebé mak serbisu kleur ona hanesan asume kargu sekretária meza no vise-sekretária meza. Ita presiza halo komunikasaun molok ita halo mudansa. Se sira hakarak mantein ita atu halo nusá. Ita labele haree de’it ba partidu A ka B maibé presiza koopera hamutuk hodi asume responsabilidade mandatu tinan rua ho balun nia laran,”  Deputadu Luis Roberto fó hanoin ba Bankada FRETILIN, PLP no KHUNTO.

Deputadu Bankada KHUNTO ne’e hateten, prezidente komisaun espesializada sira maioria lidera hosi CNRT maibé tempu agora importante liu mak normaliza funsionamentu parlamentu nian.

Nia subliña, to’o oras ne’e KHUNTO seidauk iha proposta ruma atu tuur iha sekretária, vise-sekretária no prezidente komisaun espesializada sira.

“Ami seidauk iha kandidatu ruma atu ba tuur iha kargu ida-ne’e no kargu ida-ne’ebá. Ami mantein nafatin pozisaun ida, bainhira iha mudansa ba mak presiza ami prinxe entaun ami prontu. KHUNTO nia hakarak loloos ne’e parlamentu ida-ne’e ita presiza koopera hamutuk ho bankada hotu-hotu. Tempu to’o ona kria unidade nasionál. Ita lalika radikál liu ba ita-nia partidu hodi hamosu buat-ne’ebé mak ita lakohi para mosu. Tempu to’o ona iha halo de’it radikál iha opiniaun,” dehan atuál Segundu Vise-Prezidente Parlamentu Nasionál ne’e.

Notísia Relevante: Vise-Prezidente PN Na’in-Rua Mantein Nafatin

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here