Imajen Espesiál.

DILI, 22 maiu 2020 (TATOLI)—Rai nakukun. Abu-abu falun metin. Udan monu-rai. Semana ida-nia laran, udan hoban Suku Betano halo komunidade sira dadur-aan iha uma laran de’it. Ba no sai la di’ak. Book-aan hetok susar liután

Udan boot ne’ebé akontese iha sesta (22 maiu 2020) madrugada no oras ne’e udan nafatin, halo komunidade sira iha Suku Betano, Postu Administrativu Same, Munsípiu Manufahi, hoban-aan no terus iha lalubur (inundasaun) nia laran.

Komunidade iha Suku Betano nia uma barak mak bee-sa’e no tama. Bee estraga sasán no hahan sira be tau iha uma laran. To’os sira be foin mak kuda batar bá, lalubur estraga hosi rohan ba rohan. Daudaun ne’e, komunidade sira iha Suku Betano liuliu Aldeia Loro, bee hoban haleu sira-nia uma no sai mós ladi’ak.

“Suku Betano nia aldeia hitu (7) ne’e, kona hotu lalubur ka inundasaun. Só bairru balu de’it mak la afeta ba lalubur. Lalubur ne’e estraga komunidade nia sasán no ai-han sira iha uma laran. Batar sira be foin kuda iha to’os laran sira ne’e mós bee lori estraga hotu,” dehan Xefe Suku Betano, Felipe de Araújo, ba Ajénsia TATOLI liuhosi enetrevista via rede sosiál, sesta ne’e.

Daudaun ne’e, nia haktuir, nia parte servisu hamutuk ona ho autoridade munisipál hodi fó apoiu ba komunidade sira ne’ebé afetadu ba lalubur, liuliu komunidade sira iha Aldeia Loro hodi fó apoiu emerjénsia no muda sai komunidade sira ne’e ba fatin seguru.

“Ita koordena ona ho Autoridade Munisípiu Manufahi. Ohin, sira mós tun direta ona hodi fó apoiu emerjénsia ba família ne’ebé ita muda sai no apoiu sira seluk mós prosesu hela. Ohin ita muda sai komunidade uma-kain 20 hosi sira-nia uma iha Aldeia Loro hodi lori sira no hela iha Eskola Bázika Central Raifusa. Ba vítima sira ne’e, ohin, ita fó fahe ona sasán nesesidade báziku hanesan fós saka ida (1), mina litru rua (2), no sasán dapur nian sira seluk ba kada uma-kain ida-idak,” nia haktuir.

Kona-ba dadus vítima lalubur sira seluk hosi aldeia neen (6) seluk, nia dehan, dadaun ne’e nia parte sei servisu hamutuk ho xefe aldeia sira hodi halo levantamendu dadus, halo verifikasaun no tuir planu sei relata ba Autoridade Munisípal iha postu administrativu no munisípiu atu hamatan.

Entretantu, nia informa, Suku Betano iha Aldeia hitu (7) mak hanesan Aldeia Selihasan, Bemetan, Lalika, Loro, Raifusa, Leoai, no Sesurai. Populasaun sira ne’ebé hela iha aldeia hitu refere, nia dehan, tuir sensus nasional totál populasaun hamutuk na’in-7356.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here