Bee tama komunidade nia uma iha Aldeia Bemoris, Suku Fuiloro, Munisípiu Lautém. Imajen/FB

DILI, 22 maiu 2020 (TATOLI) – Udan boot ne’ebé akontese iha sesta madrugada tuku 4:00, kuaze oras haat nia-laran hamosu inundasaun boot hodi estraga uma komunidade hamutuk 10-resin iha Suku Fuiloro, Postu Administrativu Lospalos, Munisípiu Lautém.

Dezastre Naturál ne’e afeta ba aldeia sira hanesan Hama-moko, Titilari, Moto Lori, Bemoris iha suku Fuiloro, Postu Administrativu Lospalos, Munisípiu Lautém inklui edifisiu Diresaun Nasionál Transporte Terrestre (DNTT) no Ministériu Administrasaun Estatál (MAE) Munisípiu.

“Udan Boot kuaze oras haat nia-laran ne’e estraga uma komunidade hamutuk 10 no lori motor rua, maibé konsege salva no laiha ema ida mate no kanek. Edifísiu Estadu rua maka bee tama”, tenik Komunidade Aldeia Bemoris, Justino Fernandes, ba agência Tatoli via telefónika, sesta ne’e.

Kona-ba plantasaun, nia dehan parte Ministériu Agrikultura Peskas (MAP) sei halo indetifikasaun molok hato’o dadus kompletu.

Nia dehan, ohin dader madrugada udan boot konsege tama uma-laran, sasán estraga no bee lori hotu.

“Ami-nia uma mós bee tama hotu, tanba ne’e husu Governu fó atensaun ka apoia ruma”, nia akresenta.

Aleinde udan-boot to’o inundasaun iha parte Leste, akontese mós iha parte súl hanesan Suai hodi estrada ponte no estrada inklui komunidade nia uma balun.

Iha sorin seluk, Ministru Obra Públika, Salvador Eugênio Soares dos Reis Pires, hafoin simu informasaun orienta kedas ekipa tékniku Diresaun Jerál Obras Públika (DGOP) no Institutu Jestaun Ekipamentu (IGE, sigla portugés) hodi destaka ba Kosta Súl inklui Munisípiu Lautém hodi halo atendimentu emerjénsia no halo levantamentu dadus ba inundasaun no estragu iha munisípiu sira.

Hafoin udan boot iha loron-rua hahú husi 21 no 22 fulan-maiu nian, Kosta Súl, Munisípiu Covalima, Manufahi, Natarbora, Munisípiu Manatuto, Viqueque inklui Lautém iha estragu barak ba estrada no ponte sira inklui komunidade sira ninia rezidénsia no sasán barak tanba inundasaun.

Tanba ne’e, Ministru Salvador orienta ekipa DGOP no IGE hodi halo atendimentu emerjénsia hodi bele normaliza hikas movimentasaun komunidade nian inklui transporte públiku no privadu.

Hafoin simu orientasaun, IGE sei destaka ekipamentu pezadu sira ba Kosta Súl inklui Lautém hodi halo atendimentu.

Ekipamentu pezadu IGE nian antes ne’e destaka ona iha postu balun Kosta Súl nian inklui Lautém hodi halo atendimentu iha situasaun emerjénsia.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here