Konstrusaun uma iha Because. Imajen Tatoli/Osória Marques.

DILI, 22 maiu 2020 (TATOLI)–Governu liuhosi Ministériu Obras Públika (MOP)  halo uma walu (8) Ba vitima dezastre naturál ne’ebé akontese rezulta lalubur (inundasaun) ne’ebe bee-tama no estraga komunidade sira-nia uma iha fulan marsu (sesta, 13 marsu 2020) liu ba ne’e.

Notísia Relevante: SEPS Prepara Ekipa 12 Halo Identifikasaun Dadus Ba Komunidade Afetadu Lalubur

Ekipa Implementasaun hosi Kompañia Quartos Colegas, Lda, Renato Dasiwa hateten, obra ne’e Estadu nian nune’e sira tuir de’it orientasaun hosi Ministériu Obras Públiku (MOP) no Ajénsia Dezenvolvimentu Nasionál (ADN) hodi halo uma ba komunidade afetadu sira.

Ekipa Implementasaun hosi Kompañia Quartos Colegas, Lda, Renato Dasiwa

“Tuir ami-nia hatene katak ami-nia kompañia mak menan tender no ami hetan autorizasaun hosi MOP no Ajénsia Dezenvolvimentu Nasionál. Tanba ida-ne’e obra Estadu nian. Ami halo uma hamutuk ualu (8). Uma haat (4) iha Parte Suku Bekora nian no uma haat (4) seluk iha Santa Krus nian inklui hadi’a moru no halo renovazen,” dehan Renato Dasiwa ba Ajénsia TATOLI, iha Ponte Mya Friend, Santa Crus, Dili, sesta ne’e.

Konstrusaun ba uma ualu (8) ne’e, Renato Dasiwa dehan, hanesan emerjénsia tanba ida ne’e halo la to’o tinan ida uma refere bele ramata ona.

Nia dehan, uma ho medida 7 X 9 ne’e kompostu hosi kuartu tolu, sala vizita ida, dapur, haris fatin inklui varanda.

Entretantu, Xefe Suku Becora, António da Silva Soares informa,  nia parte seidauk hatene kona ba Estadu no Governu halo uma ba vitima dezastre natural sira iha suku ne’ebé nia lidera.

“Ha’u seidauk simu informasaun ida kona-ba Estadu no Governu katak atu halo uma ba komunidade afetadu ba inundasaun ne’ebé akontese iha loron 13 marsu liubá ne’e. Ha’u simu informasaun hosi Sekretáriu Estadu Protesaun Sivíl (SEPS) mak orienta sira ne’ebé mak uma estragu hodi simu materiál konstrusaun maibé buat seluk ha’u lahatene ida,” dehan Xefe Suku Becora ne’e.

Nia hateten, komunidade parte Suku Becora nia uma no sasán mós hetan estragus hosi lalubur maibé iha orientasaun hosi Governu katak sira simu ona apoiu emerjénsia ba faze dahuluk nian no faze daruak mak atu simu materiál konstrusaun.

Iha sorin seluk, vitima lalubur Zuela Ines hatete nia agradese ba avo Xanana Gusmão tanba liuhosi Xanana Gusmão mak ohin loron uma hirak ne’e bele hahú halo konstrusaun.

“Ha’u hatene katak avo Xanana Gusmão mak orienta kompañia sira mai halo ami-nia uma. Tanba iha momentu ne’ebá ne’e, ha’u husu ajudu ba avo Xanana maibé avo Xanana nonook no la resposta. Hafoin ami halo tetuk ami-nia uma, depois liu fulan ida hanesan ne’e, avo Xanana mai halo survei no parte ADN mós mai sukat. No iha sábadu semana (16/05/2020) kotuk sira hahú halo uma ba ami,” dehan vitima dezastre natural ne’e.

Nia haktuir, sente kontente no laiha liafuan seluk aleinde agradese ba avo Xanana Gusmão tanba nia mak uma ne’e bele hahú harii.

“Konforme informasaun ne’ebé mak ami rona katak buat hotu entrega ba kompañia mak halo uma no ami hein simu xave de’it, hafoin ami hodi hela,” nia haktuir.

Notísia Relevante: Dadus Provizóriu, Xefe Família 4286 Afetada Ba Inundasaun

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here