Atividade AIFASA hamutuk ho PNTL iha terrenu, bainhira halo distruisaun iha Tibar, ba produtu apreensaun iha loja sira iha kapitál Dili, tersa (25/02). Imajen Tatoli/António Gonçalves

DILI, 22 maiu 2020 (TATOLI) – Diretór Operasaun Autoridade Inspesaun no Fiskalizasaun Atividade Ekonómika Sanitária no Alimentár, Institutu Públiku (AIFAESA,IP), Gabriel da Costa, informa durante fulan-janeiru to’o maiu, iha kompañia hamutuk 11 maka komete irregularidade no konsege selu multa ba AIFAESA.

“Husi fulan lima nia laran, iha kompañia hamutuk 11 maka komete irregularidade no empreza sira kuaze selu multa ona. Totál koema ne’ebé maka sira selu ba ami daudaun ne’e rejista montante $10.300”, dehan Dirijente ne’e ba Agência Tatoli, iha ninia knaar fatin, Villa Verde, sesta ne’e.

Tuir Diretór ne’e, irregularidade ne’ebé kompañia hirak ne’e komete ho tipu hanesan produtu a’at, lisensa atividade laiha, lisensa mate, lisensa la tuir atividade no produtu liu prazu.

Nia esplika, bainhira ekipa operasaun AIFAESA ba terrenu no hetan infrasaun iha estabelesimentu ruma maka sei halo prosesu auto-notísia kontra ordenasaun.

“Nune’e, ami sei submete ba parte ami jurídiku, liuliu ba Divizaun Kontra Ordenasaun, tanba sira maka sei haree rejistu hafoin sei halo notifikasaun ba estabelesimentu ne’ebé komete infrasaun. Tuir lei, sira iha loron 10 nia laran hodi defende sira nia-an no sira bele lori advogadu atu esplika razaun”, Gabriel akresenta.

Nia adianta, hafoin parte jurídiku AIFAESA nian halo notifikasaun ba kompañia, nune’e sira hato’o parser ba inspesaun AIFAESA nian hodi bele haree katak kompañia ne’e bele selu koema tuir irregularidade ne’ebé sira halo.

“Bainhira kompañia ne’e durante loron sanulu maka nia la mai atu hatan ninian razaun sira ne’ebé nia halo, signifika katak nia atu selu koema tuir lei númeru 24/2017, ne’ebé kiik liu maka $1.000 no boot maka $10.000”, nia akresenta.

Maibe selu koema husi infratór ne’ebé komete irregularidade, depende  ba pareser ne’ebé maka parte jurídiku hato’o ba inspektór AIFAESA nian.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here