Primeiru-Ministru, Taur Matan Ruak, konvoka reuniaun entre Ekipa CIGC no Komisaun Interministeriál ba Koordenasaun Medida Prevensaun no Kontrolu COVID-19 iha Ministériu Finansa, Aitarak-Laran, sexta (22/05). Imajen Tatoli/Egas Cristovão

DILI, 22 maiu 2020 (TATOLI) – Iha loron 27 abríl, Prezidente Repúblika, Francisco Guterres ‘Lú Olo, liuhosi Dekretu Prezidensiál númeru 32/2020 promulga estensaun Estadu Emerjénsia (EE) períodu daruak ho durasaun loron-30, hahú husi oras 00.00 loron 28 abríl to’o oras 23:59 27 maiu 2020, tanba ne’e loron hirak tan sei ramata.

Iha sesta ne’e, Ekipa Sala Situasaun, Sentru Integradu Jestaun Krize (CIGC, sigla portugés) hala’o enkontru ho Komisaun Interministeriál ba kombate surtu COVID-19 iha Timor-Leste, hodi haree ba desizaun estratéjika durante implementasaun períodu EE faze daruak.

Hafoin enkontru, Segundu Komandante Operasionál CIGC, Brigadeiru Jenerál João Miranda ‘Aluc Descartes’, hateten desizaun atu estende EE depende Konsellu Ministru (KM) ne’ebé sei hala’o iha semana oin.

“Ekipa Sentru Integradu partisipa enkontru ho Komisaun Interministeriál hodi hato’o proposta estratéjika atu ezekuta hafoin situasaun Estadu Emerjénsia faze daruak. Sala Situasaun hatama tiha ona proposta ba Komisaun Interministeriál, tanba ne’e hein hela aprovasaun hosi Konsellu Ministru ne’ebé sei hala’o iha semana oin, atu estende Estadu Emerjénsia ka hakotu depende ba desizaun Governu”, relata Segundu Komandante Operasionál CIGC, liuhosi konferénsia imprensa iha Salaun Ministériu Finansa, Aitarak-Laran.

Notísia Relevante: Prezidente Repúblika Promulga Estensaun Estadu Emerjénsia

Brigadeiru Jenerál esplika, pontu importante husi proposta ne’e katak desizaun depende ba Governu, tanba Sala Situasaun haree ba períodu situasaun EE ne’ebé estabelese husi Governu nia ezekusaun hela de’it menus semana ida atu ramata, tanba ne’e maka husi CIGC aprezenta proposta ba Governu hodi haree katak atu estende ka hakotu.

“Hosi estudu Sala Situasaun ninian, bele dehan katak iha nesesidade maibé desizaun la’ós GIGC nian maibé depende ba Konsellu Ministru. Nesesidade balun ami hatama iha proposta, ne’ebé ami hein de’it desizaun”, Aluc subliña.

Partisipa iha enkontru ne’e, membru CIGC no Komisaun Interministeriál ne’ebé prezide husi Primeiru-Ministru, Taur Matan Ruak no partisipa hosi Ministra Finansa ein ezersísiu, Sara Lobo Brites, Ministru Transporte no Komunikaun, José Agustinho, Ministru Reforma Lejizlativa no Asuntu Parlamentár, Fidelis Manuel Leite Magalhães, Ministru Negósiu Estranjeiru no Kooperasaun, Dionísio da Costa Babo Soares.

Nune’e mós, Ministru Defeza no Seguransa no Ministru Interiór interinu, Filomeno da Paixão de Jesus, Ministra Edukasaun, Juventude no Desportu, Dulce Soares, Ministru Justisa, Manuel Cárceres, Ministru Agrikultura no Peska, Joaquim José Gusmão dos Reis Martins, Ministru Saúde interinu, Bonifácio Maukoli dos Reis, Ministru Ensinu Superior, Longuinhos dos Santos, Xefe Estadu Maiór Jeneral FALINTIL-Forsa Defeza Timor-Leste (F-FDTL), Majór Jenerál Lere Anan Timur, Komandante Jerál Polísia Nasionál Timor-Leste (PNTL), Komisáriu Faustinho da Silva.

Antes ne’e, Prezidente Repúblika, Francisco Guterres ‘Lú Olo’ dekreta Estadu Emerjénsia faze dahuluk, ne’ebé hahú entra ein vigór iha loron 28 marsu hahú oras 00:00  to’o 26 abríl 2020 oras 23:59, atu fó dalan ba Governu implementa médida espesífiku sira hodi prevene propagasaun COVID-19.

Haree ba nesesidade atu estende, Xefe Estadu promulga estensaun Estadu Emerjénsia períodu daruak ho durasaun loron-30 tuir pedidu Govenu, ne’ebé sei ramata iha 27 maiu 2020 oras 23:59.

Entretantu, hafoin Timor-Leste rejista kazu pozitivu COVID-19 dahuluk iha 21 marsu 2020, kazu ikus liu rejista iha 24 abríl ho totál konfirmadu na’in-24 no provável na’in-haat.

Enkuantu, iha loron 15 maiu, liuhosi Sala Situasaun, CIGC deklara pasiente konfirmadu no provável rekuperadu hotu ona.

Kazu konfirmadu ne’ebé rejistadu iha Timor-Leste hanesan kazu importadu husi sidadaun ne’ebé halo viajen husi nasaun afetadu COVID-19 no Tama mai Timor-Leste liuhosi dalan fronteira terrestre no aeroportu.

Hahú loron 15 maiu, sistema alerta no resposta COVID-19 iha Timor-Leste  ne’ebé antes ne’e iha alerta 3 “Mitigasaun”, fila ba faze alerta 1 “Kontensaun”, nune’e komunidade sira bele kontinua halo prevensaun ba an rasik.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here