DILI, 22 maiu 2020 (TATOLI)–Ministra Solidaridade Sosiál no Inkluzaun (MSSI), Armanda Berta dos Santos, hateten nia parte pasiénsia simu krítika hosi komunidade sira iha Timor laran tomak relasiona ho pagamentu subsídiu agregadus familiár ne’ebé atraza.
Notísia Relevante: Armanda Berta: “Governu Labele Promete Tanba Dadus Atu Simu Subsídiu Sei iha Faze Preparasaun”
“Iha momentu importante ida ne’e, ha’u mós hakarak hato’o ba públiku sira hotu katak iha tempu badak ita sei hahú halo pagamentu iha Timor laran tomak. Ita iha atrazu ba pagamentu ne’e, halo ita nia povu sira mós hato’o krítika maka’as mai Governu no ita simu krítika sira ne’e ho pasiénsia no ho hakruuk ba sira, tanba sira iha razaun duni atu halo krítika hasoru ita,” dehan Armanda Berta dos Santos ba jornalista sira iha salaun MSSI, Caicoli, Dili, sesta ne’e.
Governante ne’e hakarak haklaken ba públiku katak MSSI atu impelmenta programa ida tenke haktuir ba prosedimentu no lei sira ne’ebé hatuur no matadalan ba ema hotu atu kumpre, tanba ne’e maka ekipa task force MSSI ho ekipa tékniku hosi Ministériu Administrasaun Estatal (MAE) halo hela preparasaun ba implementasaun programa ne’e.
“Ita hotu nia hakarak iha momentu implementasaun programa ida ne’e tenke la’o ho susesu,” nia hateten.
Tanba ne’e, nia kontinua fó korajen ba ekipa task force MSSI no MAE nian atu servisu iha terrenu relasiona ho subsídiu agregadus familiar servisu ho responsabilidade.
“Hato’o ha’u-nia korajen nafatin ba ekipa task force MSSI no ekipa hosi MAE. Ha’u dejezu katak imi-nia preparasaun no asaun to’o iha terrenu sei hetan susesu. Ha’u hakarak hato’o mós ami-nia agredese ua’in ba amigu di’ak Embaixadór Australia ho ekipa tekniku hosi Partner Human Development (PHD), ne’ebé durante ne’e fó apoiu másimu ba ekipa task force. Ha’u rekoñese imi-nia esforsu tomak bele ona iha faze preparasaun finál ba implementasaun,” governante ne’e dehan.
Notísia Relevante: Governu Australia Entrega Materiál Ijiéne Ba MSSI
Jornalista : Osória Marques
Editór : Cancio Ximenes
Atu sai succesu sempre banati ou sempre simu kuensia kuensia hosi ema nia motivasaun oin oin pr hodi ble abansadu ba oin.