Ministru Negósiu Estranjeiru no Kooperasaun, Dionísio da Costa Babo Soares. Imajen Tatoli/António Gonçalves

DILI, 21 maiu 2020 (TATOLI)-Ministru Negósiu Estranjeiru no Kooperasaun, Dionísio Babo Soares, durante konferénsia UN ESCAPE ne’ebé kinta (21/05/2020) halo liuhosi telekonferénsia hato’o polítika Timor-Leste hakarak promove ekonomia iha Ázia Pasífiku.

Kada tinan konferénsia UN ESCAPE ne’e hala’o iha Bangkok, Thailandia, maibé tinan 2020 labele realiza iha nasaun ne’ebá relasiona ho pandemia globál COVID-19. Konferénsia ne’e partisipa husi nasaun 40-resin iha Ázia Pasífiku.

“Ita nian ohin halo ona diskusaun nivél tékniku hodi debate oinsá mak promove ekonomia iha Ázia Pasífiku liliu haree ba impaktu sosiál no kooperasaun ambiente nian,”katak Governante ne’e ba Jornalista Sira iha Praia dos Coqeiros Dili, hafoin ramata telekonferénsia, ohin.

Sorumutu entre nasaun sira iha rejiaun Ázia Pasífiku ne’e atu deskute kona-ba promosaun ekonomia, sosiál, ambiente iha Oseaníku ba dezenvolvimentu sustentavél.

“Timor-Leste partisipa hato’o mós prespetiva hanesan nasaun ida ne’ebé ki’ik, maibé tasi bo’ot tebtebes, tanba iha futuru ita hateke ba tasi hanesan fatin ida ne’ebé hodi sadere ita-nia moris ba, ho nune’e iha tinan hirak kotuk governu hatudu ona maun Xanana hanesan Xefe delegasaun ba iha ekonomia azúl hodi haree asuntu kona-ba tasi tomak nian,”tenik Babo.

Tanba Timor-Leste mós iha rikusoin barak iha tasi laran  ne’ebe maka presiza prezerva sai hanesan fontes ekonomia la’ós rekoilla de’it mak husi mina no gas.

Daudauk ne’e Governnu Timor-Leste dezenvolve hela planu jerál kona-ba poluisaun ne’ebé iha prioridade lubuk ida presiza atu aposta hanesan sustentabilidade peska, dezenvolvimentu turizmu no rekupera filafali animal no buat moris tasi nian hodi sustenta dezenvolvimentu nasaun nian.

“Ita iha konferénsia ne’e, hanoin katak aposta nafatin iha aspetu tasi nian. Ita haree mundu agora orienta liu ba tasi hanesan fonte alternativu ida ba moris futuru jerasaun, entaun ita nasaun ida ne’ebé tasi luan tebes tenke haree oinsá bele dezenvolve ho di’ak,” katak Eis Ministru Administrasaun Estatál.

Jornalista  : Hortencio Sanchez

Editór        : Agapito dos Santos

HAKEREK NO HATÁN

Please enter your comment!
Please enter your name here