Ministru Transporte no Komunikasaun, José Agustinho da Silva. Imajen Tatoli/Egas Cristovão

DILI, 21 maiu 2020 (TATOLI) – Organizasaun Nasaun Unida (ONU) liuhosi Programa Mundiál ba ai-han (WFP, sigla inglés) hakarak fó asisténsia umanitária iha setór aéreu Timor-Leste, liuliu charter voo ne’ebé organizada husi WFP, ne’ebé sei fó tulun ba kada país no pesoál ba seguransa ai-han no ai-moruk.

Ba kestaun ne’e, Ministru Transporte no Komunikasaun, José Agostinho da Silva, informa liuhosi karta Sekretáriu Jerál ONU iha posibilidade atu fasilita kargu rejionál no pasajeiru kada país inklui Timor-Leste hodi suporta asisténsia umanitária liga ba pandemia COVID-19, ho nune’e Governu hein pedidu eskrita ba apoia ne’e hodi hala’o transportasaun ekipamentu médiku balun iha nasaun Ázia.

“Ita-nia parte Governu agora hein hela, karik sira-nia pedidu eskritamente to’o maka ita foin prosesa hodi husu apoia atu fasilita transporte aéreu ne’e”, tenik Ministru José Agostinho iha edifísiu Ministériu Finansa, Aitarak-Laran, kinta ne’e.

Notisia Relevante: ONU Prontu Fó Asisténsia Umanitária Iha Períodu Luta Kontra COVID-19

Tuir Ministru, Governu presiza apoia transporte aéreu atu fasilita tula ekipamentu médiku no ai-han balun ne’ebé hala’o ona prosesu akizisaun.

“Iha tempu agora, ita-nia Governu Timor-Leste halo akizasaun ba ai-moruk no ekipamentu médiku, inklui foos, entaun ita iha posibilidade bele uza meiu transporte ida husi ONU”, nia akresenta.

Governante ne’e dehan, bainhira ONU apoia transporte aéreu, kontratu entre Governu ho Airnorth kontinua la’o hodi matein konetividade entre Timor-Leste no Austrália.

“Ha’u hanoin Ministériu Saúde no Sentru Integradu Jestaun Krize (CIGC, sigla portugés) hatene liu tanba suspeitu COVID-19 halo teste iha Dili sei croos check filafali iha Austrália. Entaun ita tenke asegura konektividade ida ne’e, enkuantu apoia husi ONU atu asegura konetividade iha parte nasaun iha Ázia hanesan Indonézia, Tailándia, Korea Súl inklui nasaun seluk tan. Tanba ne’e ita agradese vontade di’ak husi ONU no espera katak bele konkretiza planu ida-ne’e”, nia adianta.

Antes ne’e, Primeiru-Ministru, Taur Matan Ruak akompaña husi Ministru José Agostinho da Silva, konvoka enkontru ho Koordenadór Rezidente ONU, Roy Trivedy, no Diretór WFP iha Timor-Leste, hodi ko’alia asuntu asisténsia umanitária ba Timor-Leste durante períodu luta kontra COVID-19.

Jornalista: Florencio Miranda Ximenes­

Editora: Julia Chatarina

HAKEREK NO HATÁN

Please enter your comment!
Please enter your name here