Primeiru-Ministru, Taur Matan Ruak. Imajen /Egas Cristovão

DILI, 21 maiu 2020 (TATOLI)–Primeiru-Ministru (PM), Taur Matan Ruak, kongratula Parlamentu Nasionál (PN) ne’ebé esforsu hodi ultrapasa diverjénsia polítika no ultrapasa problema ne’ebé iha.

“Hanesan governu, ha’u hakarak atu kongratula esforsu Parlamentu nian, hodi ultrapasa diverjénsia, ultrapasa problema sira ne’ebé mak eziste,” dehan PM Taur ba jornalista sira hafoin hala’o enkontru semanál ho Prezidente Repúblika iha Palásiu Prezidensiál Nicolau Lobato, Bairru Pité, Dili, kinta ne’e.

Nia rekoñese, iha duni problema uitoan maibé buat ne’ebé liu ona atu husik hela ba kotuk no tenke hanoin ba oin.

“Infelizmente iha problema uitoan maibé hanesan baibain ita dehan katak kuandu bee fakar ona, ita lalika tanis tuir bee ne’ebé fakar ne’e. Haree fali oinsá mak aban ne’e ita ba oin,” nia ekonraja.

Tanba ne’e, Taur apela, hanesan soberania ida ne’ebé mak lidera ezekutivu, iha ne’ebé Parlamentu Nasionál estabelese fila-fali ba normalidade no Primeiru-Ministru hakarak lori fali Orsamentu Jerál estadu ba PN, tanba nasun labele funsiona ho baze orsamentu duodésimu.

“Ita presiza atu reativa fali ita-ninia ekonomia, ita-nia populasaun sira bele moris la’o normál fila fali. Ida-ne’e mak ami-nia preokupasaun,” Taur hateten.

Taur mós aproveita oportunidade ida ne’e hakarak atu kongratula populasaun tomak no espresa ninia sentimentu kontente bainhira haree joven sira-nia komportamentu, inan-aman sira-nia komportamentu, relasiona ho situasuan sira hanesan ne’e.

“Ha’u hakarak hateten katak ha’u orgullozu loos, halo parte ezekutivu ida ne’e, lidera país ida ne’ebé ninia sidadaun esklaresidu tebes, sivizmu tebes, no parabens ba povu Timor tomak,” nia orgullu.

Hanesan Xefe governu husu atu kontinua nafatin hanesan ne’e, povu tenke kontinua servisu hanesan baibain hodi hametin nafatin unidade no hametin nasaun.

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here