Primeiru-Ministru, Taur Matan Ruak, prezide reuniaun Konsellu Ministru iha Salaun Ministériu Finansa, Aitarak-Laran, kinta (21/05). Imajen Tatoli/Egas Cristovão

DILI, 21 maiu 2020 (TATOLI) – Liuhosi reuniaun Konsellu Ministru (KM) estraordinária, Governu atribui podér tomak ba Ministra Finansa ein ezersísiu, Sara Lobo Brites hodi selebra akordu ida ho Organizasaun Internasionál Traballu (OIT) hodi simu subvensaun hamutuk $748.000.

Ministru Koordenadór Asuntu Ekonómiku interinu, Fidelis Manuel Leite Magalhães, relata Ministra Sara aprezenta projetu deliberasaun ne’ebé hetan aprovasaun husi Konsellu Ministru, kona-ba autorizasaun selebrasaun akordu entre Governu Timor-Leste no Organizasaun Internasionál Traballu ba subvensaun iha ámbitu programa “Leaving no one behind in Timor-Leste’s COVID-19, response Finantial Support for the implementation of the cash transfer scheme for low-income households” ka Labele husik ema ida iha kotuk hodi hatan ba COVID-19 iha Timor-Leste, apoia finanseiru implementasaun ba sistema transferénsia husi apoiu família ne’ebé ho rendimentu ki’ik”.

Ministru Koordenadór Asuntu Ekonómiku interinu no atuál Ministru Reforma Lejizlativa no Asuntu Parlamentár, Fidelis Manuel Leite Magalhães. Imajen Tatoli/Antónia Gusmão

“Tuir akordu ne’e rasik, OIT sei entrega ba Governu Timor-Leste kuantia hamutuk $748.000 hodi finansia kustu operasionál ba implementasaun apoiu agregadu família timor-oan sira ne’ebé hetan aprovasaun husi Dekretu-Lei númeru 15/2020, loron 30 abríl”, relata atuál Ministru Reforma Lejizlativa no Asuntu Parlamentár, liuhosi konferénsia imprensa iha salaun Ministériu Finansa, Aitarak-laran, kinta ne’e.

Antes ne’e, Governu liuhosi reuniaun Konsellu Ministru estraordinária, iha loron 23 abríl aprova ona proposta ne’ebé aprezenta husi Ministra Solidaridade Sosiál no Inkluzaun, Armanda Berta dos Santos kona-ba apoiu monetáriu ba agregadu familiár sira durante períodu Estadu Emerjénsia ligadu ho surtu COVID-19 iha Timor-Leste.

Ema sira ne’ebé sei sai benefisiáriu maka agregadu familiár sira kompostu hosi pelumenus sidadaun ida no rejista ona to’o loron 31 marsu 2020 iha Livru Rejistu ‘Uma Kain’ no iha família ne’e nia laran, nia elementu ida kada fulan no regulár simu osan la boot liu $500.

Relasiona ho loron fiksu atu halo pagamentu $100 ba kada uma-kain, to’o agora Governu seidauk pronunsia tanba sei kruza dadus entre Ministériu Administrasaun Estatál (MAE) no Diresaun Jerál Estatístika (DGE, sigla portugés) ne’ebé sei iha diferénsia.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here