DILI, 21 maiu 2020 (TATOLI)—Líder bankada parlamentár sira kompostu hosi FRETILIN, PLP, KHUNTO no PD aprova ona ajenda hodi realiza plenária iha semana oin.

“Hotu-hotu konkorda no komesa ohin tenke halo normalizasaun funsionamentu parlamentu nian, segunda no tersa-feira sei iha plenária. Sekretária Jerál Parlamentu Nasionál garante katak segunda no tersa-feira sei halo plenária hanesan bainbain,”  Prezidente Parlamentu Nasionál, Aniceto Guterres, informa ba jornalista sira hafoin prezide reuniaun líder bankada, iha Parlamentu Nasionál, kinta ne’e.

Nia dehan, ajenda mak hanesan normalizasaun ba funsionamentu Parlamentu Nasionál, ajendamentu sesaun plenária ba segunda no tersa-feira, normalizasaun ba komisaun espesializada permanente sira no asuntu relevante seluk tán.

Prezidente PN ne’e fó-sai, ohin, Sekretária Jerál PN, Cedelizia Faria dos Santos partisipa iha reuniuan líder bankada ne’e hodi garante funsionamentu parlamentu nasionál, hahú hosi ohin ba-oin.

Prezidente Parlamentu Nasionál realiza reuniaun líder bankada ne’e ho urjénsia tanba situasaun, maibé oras rua antes aviza tiha ona bankada parlamentár sira.

“Balun la mai maibé ohin bankada FRETILIN, KHUNTO, PD no PLP partisipa enkontru ne’e. Karik, balu la partisipa ne’e loron rua liubá ninia tensaun seidauk tún karik,” nia hateten.

Prezidente Parlamentu Nasionál ne’e hateten, se plenária mak barullu tán ne’e situasaun seluk fali ona maibé nia katak sei la akontese barullu tán.

“Laiha nesesidade para halo komunikasaun ho prezidente parlamentu sesante, se iha Governu karik ministru sira troka. Uluk, ha’u halo hanesan ne’e. Entrega no hasoru malu,” nia informa.

Aniceto Guterres sei halo esforsu hotu hodi garante funsionamentu parlamentu nian la’o ho di’ak tanba razaun bankada tolu husu alterasaun tanba atividade komisaun la la’o no funsionamentu parlamentu paralizadu.

Aniceto Guterres afirma, paraliza funsionamentu parlamentu ne’e hodi obriga Prezidente Repúblika halo disolusaun ba parlamentu.

“Prezidente Parlamentu mak husu fali Prezidente Repúblika mai disolve parlamentu, saida mak ne’e,” Aniceto Guterres hateten.

Iha reuniaun líder bankada ne’e partisipa hosi reprezentante governu nian atuál Sekretáriu Estadu Komunikasaun Sosiál, Mericio Juvinal “Akara”.

Notísia Relevante: Aniceto Guterres Hahú Lidera Reuniaun Líder Bankada, PD Mós Partisipa

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here