Komandante Jerál Polísia Nasionál Timor-Leste (PNTL), Komisáriu Faustino da Costa. Imajen Tatoli/Cipriano Colo

DILI, 21 maiu 2020 (TATOLI)–Komandu Polísia Nasionál Timor Leste (PNTL) liuhosi Komandante Jerál, Komisáriu Faustino da Costa, agradese no louva maturidade povu Timor Leste nian  perante situasaun Estadu Emerjénsia no situasaun polítika rai laran.

Faustino espresa sentidu agradesimentu ne’e, hafoin hala’o enkontru ho Prezidente Repúblika (PR), Francisco Guterres “Lú Olo”, iha Palásiu Prezidensiál Nicolau Lobato, Bairu Pité, Dili.

“Ha’u relata ba Prezidente Repúblika katak, situasaun jerál teritóriu nasionál, la’o di’ak, kalma no hakmatek. Maski sei iha tensaun polítika ne’ebé ema hotu akompaña maibé ida ne’e mós aproveita atu agradese no apresia ita-nia povu. Katak maski hotu-hotu akompaña transmisaun direta maibé ita-nia povu nafatin hakmatek,” dehan Faustino da Costa ba jornalista sira, kinta ne’e.

Komandu mós iha esperansa katak, estabilidade nasionál depende ba konsiénsia hosi soiedade Timor-Leste.

Tanba ne’e, nia mós apela nafatin ba povu atu perante situasaun politika hakmatek nafatin, hodi fó tempu ba ulun boot sira atu buka solusaun.

Nia hateten, durante enkontru, Prezidente Repúblika hato’o mós ninia apresiasaun ba Polísia Nasional Timor Leste (PNTL) liuliu durante periudu Estadu Emerjénsia dahuluk no daruak nian ne’e.

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here