Vise Ministru Ba Dezenvolvimentu Estratéjiku Saúde, atuál Ministru Saúde Interinu, Bonifácio Maucoli dos Reis. Imajen/Egas Cristóvão

DILI, 21 maiu 2020 (TATOLI)-Governu liuhosi Ministériu Saúde iha tempu badak sei halo pagamentu subsídiu ba profisionál saúde sira ne’ebé maka durante ne’e servisu ba prevensaun surtu COVID-19.

“Tuir planu iha fulan-maiu ne’e ita selu ona médiku sira ne’ebé mak iha liña oin hodi kombate surtu COVID-19 ida ne’e tanba dadus sira ne’e aprova hotu ona,”dehan, Vise Ministru Saúde En Ezersísiu, Bonifácio Maucoli dos Reis hafoin reuniaun Konsellu Ministru iha Ministériu Finansa Ai-Tarak-Laran Dili, kinta ne’e.

Tuir Governante ne’e katak, Ministériu Saúde ramata ona prosesu verifikasaun dadus ba médiku, enfermeiru, no servisu tékniku sira ne’ebé maka relata husi Munisípiu no Nasionál hodi hetan pagamentu husi Governu iha fulan-maiu nia laran.

“Orsamentu ne’ebé koloka ba médiku liña oin sira agora daudaun konklui ona ohin, no dadus sira ha’u konklui no ha’u mós asina ona dadus sira ne’ebé mak mai husi Munisípiu sira,” katak Ministru Saúde en Ezersísiu.

Entertantu, foinlalais Ministru sira liuhosi Reuniaun Konsellu Ministru aprova valór suplementu remuneratóriu $ 25 ba ekipa liña oin kada loron.

Kategoria dahuluk ho valór $ 25 ba sira ne’ebé servisu iha izolamentu no laboratóriu, $ 20 ba sira ne’ebé iha kuarentena, no $ 15 ba sira ne’ebeé servisu administrativu ka sira ne’ebé maka laiha kontaktu direta.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here