Primeiru-Ministru, Taur Matan Ruak, prezide reuniaun Konsellu Ministru iha Salaun Ministériu Finansa, Aitarak-Laran, kinta (21/05). Imajen Tatoli/Egas Cristovão

DILI, 21 maiu 2020 (TATOLI) – Governu liuhosi reuniaun Konsellu Ministru estraordinária halo alterasaun daruak ba Lei Orgánika VIII Governu nian, ne’ebé Primeiru-Ministru (PM), Taur Matan Ruak aprezenta ona liuhosi Projetu Dekretu-Lei iha reuniaun antes ne’e.

Ministru Reforma Lejizlativa no Asuntu Parlamentár, Fidelis Manuel Leite Magalhães, informa reuniaun ohin KM konserta liután kompeténsia entre Prezidénsia Konsellu Ministru (PCM, sigla portugés) no Ministériu Koordenadór Asuntu Ekonómiku (MKAE) nian.

“Alterasaun daruak ba Orgánika VIII Governu nian atu konserta liután kompeténsia entre PCM no MKAE nian, tanba PCM nia natureza hanesan Portavóz Governu tomak nian, inklui iha ninia kna’ar ida maka hodi haree ba lala’ok tomak Konsellu Ministru nian. Entaun iha alterasaun ne’e muda tiha katak PCM maka uluk mak ba MKAE, tanba iha alterasaun dahuluk orgánika ne’e MKAE uluk tiha mak PCM”, haktuir Ministru Fidelis.

Notísia Relevante: Governu Halo Mudansa ba Orgánika VIII Governu, Sei Iha Vise-PM Na’in-Rua

Ministru Koordenadór Asuntu Ekonómiku interinu ne’e esplika MKAE nia natureza hanesan setorál ne’ebé haree ba asuntu ekonómiku, enkuantu PCM iha natureza transversál, tanba ne’e maka iha mudansa oituan atu fasilita koordenasaun di’ak liután iha Governu iha tempu oin mai.

Governante ne’e adianta, kona-ba alterasaun ne’e kompeténsia tomak ezekutivu nian no Governu bele deside modelu saida de’it maka hanoin di’ak liu atu fasilita ninia funsionamentu.

Entretantu iha alterasaun orgánika daruak ne’e, sei iha Vise-PM na’in-rua hodi fó apoiu ba Xefe Governu iha ninia kna’ar.

Orgánika foun ne’e sei iha Ministru ida ba Asuntu Parlamentár no Komunikasaun Sosiál, Ministru ba Planu no Ordenamentu Territóriu, Vise-Ministru ida ba Turizmu, Kultura, no Komunitáriu, Vise-Ministru ida ba Komérsiu no Indústria no Vise-Ministru Interiór ida.

Iha estrutura foun ne’e, hasai kargu governamentál husi Ministru Reforma, Lejizlativa no Asuntu Parlamentár no Ministru Planeamentu no Investimentu Estratéjiku no la prevee tan ezisténsia Ministru Estadu.

Sekretáriadu g7+ ne’ebé antes ne’e tutela iha PCM, iha estrutura foun instituisaun ne’e sei sai órgaun independente, enkuantu Komisaun Nasionál Aprovizionamentu (CNA, sigla portugés) sei integra ba Ministériu Finansa.

Antes ne’e, iha loron 24 Jullu 2018, Governu liuhosi Konsellu Ministru aprova Dekretu Lei Estrutura Orgánika Governu Konstitusionál VIII nian no iha loron 17 agostu 2018, Prezidente Repúblika, Francisco Guterres ‘Lú Olo’ promulga diploma ne’e.

Estrutura orgánika ne’ebé hetan ona aprovasaun ne’e Governu konstitui husi Primeiru-Ministru, Ministru Estadu, Ministru Koordenadór, Ministru, Vise-Ministru no Sekretáriu Estadu, ho estrutura hanesan Ministru Estadu Prezidénsia Konsellu Ministrus, Ministru Koordenadór Asuntu Ekonómiku, Ministru Reforma Lejizlativa no Asuntu Parlamentár, Ministru Finansa, Ministru Negósiu Estranjeiru no Kooperasaun, Ministru Justisa, Ministru Administrasaun Estatál, Ministru Saúde, Ministru Edukasaun, Juventude no Desportu, Ministru Ensinu Superiór, Siénsia no Kultura, Ministru Solidariedade Sosiál no Inkluzaun, Ministru ba Asuntu Kombatente Libertasaun Nasionál, Ministru Planeamentu no Investimentu Estratéjiku, Ministru Obra Públika, Ministru Transporte no Komunikasaun, Ministru Turizmu, Komérsiu no Indústria, Ministru Agrikultura no Peskas, Ministru Defeza, Ministru Interiór, Ministru Petróleu no Rekursus Minerais.

Ministru balun, iha ninia knaar ne’ebé nia hala’o, hetan tulun husi Vise-Ministru no Sekretáriu Estadu sira mak hanesan, Ministru Koordenadór Asuntu Ekonómiku hetan tulun husi Sekretáriu Estadu Formasaun Profisionál no Empregu, husi Sekretáriu Estadu Dezenvolvimentu Setór Kooperativu no husi Sekretáriu Estadu Ambiente nian.

Enkuantu, Ministru Reforma Lejizlativa no Asuntus Parlamentares hetan tulun husi Sekretáriu Estadu Komunikasaun Sosiál, Ministru Finansa hetan tulun husi Vise-Ministru Finansa, Ministru Negósiu Estranjeiru no Kooperasaun hetan tulun husi Vise-Ministru NegósiuEstranjeiru no Kooperasaun, Ministru Justisa hetan tulun husi Vise-Ministru Justisa no Sekretáriu Estadu Terra no Propriedade, Ministru Administrasaun Estatál hetan tulun husi Vise-Ministru Administrasaun Estatál.

Nune’e mós Ministru Saúde hetan tulun husi Vise-Ministru ba Kuidadu Saúde Primáriu no husi Vise-Ministru ba Dezenvolvimentu Estratéjiku Saúde nian, Ministru Edukasaun, Juventude no Desportu hetan tulun husi Vise-Ministru Edukasaun, Juventude no Desportu no husi Sekretáriu Estadu Juventude no Desportu, Ministru Ensinu Superiór, Siénsia no Kultura hetan tulun husi Sekretáriu Estadu Arte no Kultura, Ministru Solidariedade Sosiál hetan tulun husi Vise-Ministru Solidariedade Sosiál, Ministru ba Asuntus Kombatentes Libertasaun Nasionál hetan tulun husi Sekretáriu Estadu ba Asuntu Kombatente Libertasaun Nasionál.

Ministru Obras Públika hetan tulun husi Vise-Ministru Obras Públika, Ministru Turizmu, Komérsiu no Indústria hetan tulun husi Vise-Ministru Turizmu, Komérsiu no Indústria, Ministru Agrikultura no Peska hetan tulun husi Sekretáriu Estadu Peska, Ministru Interiór hetan tulun husi Sekretáriu Estadu Protesaun Sivíl, no Sekretáriu Estadu ba Igualdade no Inkluzaun depende diretamente ba Primeiru-Ministru.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here