Primeiru-Ministru, Taur Matan Ruak, prezide reuniaun Konsellu Ministru iha Salaun Ministériu Finansa, Aitarak-Laran, kinta (21/05). Imajen Tatoli/Egas Cristovão

DILI, 21 maiu 2020 (TATOLI) – Ezekutivu sira liuhosi reuniaun Konsellu Ministru (KM) estraordinária, aprova ona kalendáriu preparasaun Proposta Orsamentu Jerál Estadu (OJE) 2020, tanba daudaun ne’e Governu uza Dotasaun Orsamentu Temporáriu (DOT) durante kuaze fulan-neen ona hodi sustenta mákina estadu.

“Konsellu Ministru aprova kalendáriu ba preparasaun Orsamentu Jerál Estadu ba tinan fiskál 2020”, relata Ministru Reforma Lejizlativa no Asuntu Parlamentár, Fidelis Manuel Leite Magalhães liuhosi konferénsia imprensa hafoin reuniaun KM iha Salaun Ministériu Finansa, Aitarak-Laran, kinta ne’e.

Notísia Relevante: Proposta OJE 2020 La Pasa

Tuir kalendáriu ne’ebé ezekutivu sira aprova, proposta lei ne’e sei analiza iha reuniaun KM loron 22 jullu 2020 no sei submete ba PN iha 30 jullu 2020.

Ministru Koordenadór Asuntu Ekonómiku interinu ne’e realsa, kalendáriu ne’ebé aprova sei presiza konserta ho ajenda PN nian durante tinan tomak, nune’e mós ajenda komisaun sira nian.

Governu Aprezenta Proposta OJE 2020 ba Datoluk

Bainhira Governu aprezenta Proposta Orsamentu tinan ne’e, maka aprezentasaun ne’e ba datoluk ona tanba antes ne’e Governu aprezenta ona maibé seidauk aprovadu.

Iha loron 15 outubru, Governu liuhosi Ministra Finansa ein ezersísiu, Sara Lobo Brites, hamutuk ho Ministru Fidelis submete Proposta Lei OJE 2020 ba Parlamentu hodi diskute.

Proposta dahuluk ne’ebé Governu submete ho montante biliaun $1,950 (inklui impréstimu $73), bainhira esklui impréstimu hamutuk biliaun $1,887, no bainhira fahe tuir kategoria saláriu no vensimentu millaun $241,271, bens no servisu millaun $738,428, transferénsia públika millaun $457,773, kapitál menór millaun $53,267 no kapitál dezenvolvimentu millaun $459,260.

Maski nune’e, iha loron 3 dezembru 2019, Primeiru-Ministru, Taur Matan Ruak, retira Proposta OJE 2020 husi PN tanba rona opiniaun no preokupasaun husi deputadu sira ne’ebé konsidera montante boot liu no kontra Lei Jestaun Finanseira.

Nune’e, Governu lori hikas proposta ba daruak hodi diskute maibé iha loron 17 janeiru 2020, Proposta OJE 2020 la pasa iha diskusaun jeneralidade ho rezultadu votasaun a-favór 13, kontra 15 no abstensaun 25.

Proposta foun OJE 2020 ne’ebé la pasa ho montante biliaun $1,668, kompostu hosi sálariu no vensimentu millaun $235,6, bens no servisu millaun $561,8, transferénsia públika millaun $329,706, kapitál menór millaun $31,548 no kapitál dezenvolvimentu millaun $488,837.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here