Reitór IOB, Augusto Soares. Foto: Portal IOB

DILI, 21 maiu 2020 (TATOLI)-Prezidente Board Klibur Instituisaun Ensinu Superiór Timor-Leste (IESP-TL), Agusto da Conceição Soares, hateten Banku Nasionál Komérsiu Timor-Leste (BNCTL-sigla portugés) fó ona autorizasaun ba dosente no traballadór sira ne’ebé maka servisu iha universidade privada hodi hetan kreditu.

Maibé nia dehan benefisiáriu sira ne’ebé maka atu hato’o pedidu hodi hetan kreditu tenki priense kritéria haat husi BNCTL.

“Kritéria Haat ne’ebé BNCTL husu ba IESP sira atu kumpre mak estatutu IESP nian tenki legalizadu, tenki rejistu iha SERVE, tenki iha relatóriu finanseira no tenki garantidu,” dehan, atuál Reitór IOB ne’e ba jornalista sira hafoin halo sorumutu ho Ministru Ensinu Superiór Siénsia no Kultura iha Colmera, Dili kinta (21/05/2020).

Nia hatutan BNCTL relata ona sira preparadu atu simu proposta kreditu husi dosente no traballadór sira iha universidade privada 10-resin ne’ebé ejiste iha Timor-Leste.

“Semana kotuk BNCTL konvoka ona enkontru ho ami, mágnifiku Reitór sira kona-ba oinsá atu asesu ba kreditu ne’ebé iha,”tenik tan.

Nia reforsa husi enkontru ne’e KIESP-TL propoin ba BNCTL atu fó juru pursentu neen (6 %), maibé husi parte Banku Nasionál ne’e seidauk deside tanba hein proposta husi kliente sira.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here