Bankada parlamentár tolu (3) kompostu hosi Congresso Nacional da Reconstrução de Timor (CNRT), União Democrática Timorense-Frende Mudança (UDT/FM) no Partidu Unidade Dezenvolvimentu Demokrátiku (PUDD). hala'o Konferénsia Imprensa. Imajen Tatoli/Evaristo Soares Martins.

DILI, 21 maiu 2020 (TATOLI)—Bankada parlamentár tolu (3) kompostu hosi Congresso Nacional da Reconstrução de Timor (CNRT), União Democrática Timorense-Frende Mudança (UDT/FM) no Partidu Unidade Dezenvolvimentu Demokrátiku (PUDD) sei la partisipa kualkér reuniaun ne’ebé lidera hosi Prezidente Parlamentu Nasionál, Aniceto Guterres, tanba konsidera ilegál.

Notísia Relevante: Arão Noé Sei Hato’o Rekursu Ba Tribunál Rekursu

“Bankada CNRT, UDT/FM no PUDD sei la partisipa ba kualkér atividade iha Parlamentu Nasionál ne’ebé konvoka hosi Prezidente Parlamentu Nasionál ilegál to’o desizaun husi Tribunál Rekursu ne’ebé mak justu tuir konstituisaun no lei ne’ebé mak vinkula ita-nia rain,” Reprezentante Bankada Parlamentár tolu atuál Vise-Xefe Bankada CNRT, Patrocínio dos Reis Fernandes, informa liuhosi Konferénsia Imprensa, ne’ebé realiza iha sala bankada CNRT, iha Parlamentu Nasionál, kinta ne’e.

Nia hatutan, Bankada CNRT, UDT/FM no PUDD konsidera prosesu ka reuniaun ne’ebé akontese daudaun ne’e, líder bankada ne’ebé partisipa Bankada FRETILIN, PLP, KHUNTO no PD ne’ebé lidera hosi Aniceto Guterres ilegál.

“Prosesu ne’ebé akontese dadaun ne’e “Hadau Podér Forsada” tanba la tuir rekejitu konstitusionál, legál no rejimentál. Tanba-ne’e, Bankada CNRT, UDT/FM no PUDD foti pozisaun no konsidera konferénsia líder Bankada no konvokasaun plenária iha loron 18-19 maiu hodi troka átual Prezidente Parlamentu Nasionál, Arão Noé de Jesus da Costa Amaral, nu’udar aktu ilegál tanba la tuir konstituisaun, lei no Rejimentu PN nian,” hateten Deputadu CNRT, Patrocínio dos Reis Fernandes.

Tanba ne’e, nia informa, sira-nia parte hato’o ona denúnsia de krime ba Ministériu Públiku kona-ba aktu ilegál ne’ebé mak deputadu FRETILIN, PLP, KHUNTO, inkuli deputadu PD na’in-haat (4) komete iha Uma Fukun Parlamentu Nasionál.

Ohin loron 21 maiu, nia infroma, sira hatama ona rekursu kontensiozu ba Tribunál Rekursu kona-ba Prezidente Parlamentu Nasionál, Aniceto Guterres, ne’ebé mak eleitu ho maneira ilegál ka la tuir rekijitu konstitusionál, legál no rejimentu Parlamentu nian.

Hatán ba kestaun ne’e, Prezidente Parlamentu Nasionál, Aniceto Guterres, afirma agora maioria mak manda tanba eleitu hosi deputadu na’in-40.

“Ita la presiza ko’alia legál ka illegal. Agora importante liu mak normalizasaun ba funsionamentu Parlamentu Nasionál tanba durante ne’e paralizadu,” hateten Aniceto Guterres.

Konferénsia imprensa ne’e partisipa hosi Xefe Bankada CNRT, Duarte Nunes, Xefe Bankada UDT/FM, Francisco David Xavier Carlos no Prezidente PUDD, António De Sá Benevides.

Notísia Relevante: Aniceto Guterres: “Hakarak Kestiona Prosesu Bele Tuir Dalan Legál”

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here