Ministru Koordenadór Asuntu Ekonómiku interinu no atuál Ministru Reforma Lejizlativa no Asuntu Parlamentár, Fidelis Manuel Leite Magalhães. Imajen Tatoli/Antónia Gusmão

DILI, 21 maiu 2020 (TATOLI) – Governu Austrália sei fó apoia subvensaun ho montante millaun AU$7 ba Governu Timor-Leste, hodi halo rekuperasaun ekonomia durante pandemia COVID-19.

Tuir Ministru Koordenadór Asuntu Ekonómiku, interinu, Fidelis Manuel Leite Magalhães, apoia ne’e sei liuhosi selebrasaun akordu ida entre Governu Austrália no Timor-Leste.

“Ministra Finansan ein ezersísiu aprezenta deliberasaun ne’ebé iha relasaun ho autorizasaun atubele selebra akoru ida entre Timor-Leste no Austrália. Akordu ne’e iha relasaun ho kontribuisaun finanseira direta entre Governu nasaun rua ho valór millaun AU$7 hodi bele apoia Timor-Leste ninia inisiativa iha reziliensia komunitária no rekuperasaun ekonomia durante pandemia COVID-19”, relata Ministru Fidelis liuhosi konferénsia imprensa iha Salaun Ministériu Finansa, Aitarak-Laran, kinta ne’e.

Nune’e, iha reuniaun Konsellu Ministru estraordinária, ezekutivu sira aprova dileberasaun ne’ebé aprezenta hosi Ministra Finansa ein ezersísiu, Sara Lobo Brites hodi fó autorizasaun ba Ministra ne’e hodi reprezenta Timor-Leste asina akordu ho Governu Austrália hodi simu apoia refere.

Antes ne’e, iha loron 25 marsu, Konsellu Ministru aprova Projetu Deliberasaun Governu, ne’ebé aprezenta hosi Ministru Koordenadór Asuntu Ekonómiku interinu, Fidelis Manuel Leite Magalhães kona-ba polítika redusaun impaktu ekonómiku negativu no  ba  rekuperasaun ekonómika konsekuénsia ba pandemia COVID-19.

Maski diploma ne’e aprovadu, maibé Governu labele implementa tanba liga ho Proposta Alterasaun Lei Orsamentu no Jestaun Finanseira, ne’ebé ninia pedidu debate ho karatér urjénsia la pasa iha plenária.

Pedidu ne’e hetan rejeisaun husi Parlamentu Nasionál (PN) ho rezultadu a-favór 31, kontra 33 no abstensaun 0.

Nune’e, lejizlasaun ne’e baixa ba Komisaun C, ne’ebé trata asuntu Finansa Públika no debate tuir mai sei realiza ho karatér normál.

Diploma ne’e introdús medida sira ne’ebé sei garantia kontinuidade distribuisaun no fornesimentu ba sasán esensiál sira maka hanesan produtu hahán, ai-moruk no ekipamentu klínika sira hodi bele garantia no fó kontinuidade ba prestasaun servisu  komunikasaun eletrónika sira no mós ba asesibilidade ne’ebé sei jeneralizada husi sidadaun sira hotu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here