Prezidenti da Republika, Francisco Guterres Lu Olo. Imajen/Antonio Goncalves

DILI, 20 maiu 2020 (TATOLI)–Xefe Esatdu Francisco Guterres “Lú Olo”, fiar VIII Governu Konstitusionál prepara ona Orsamentu Jerál Estadu (OJE) ba tinan 2020 no 2021.

Fiar no laran metin ne’e, Xefe Esatdu hato’o liuhosi mensajen ba no povu no nasaun Timor-Leste iha komemorasaun Loron Restaurasaun Independénsia Timor-Leste ba dala-18, iha Palásiu Prezidensiál Nicolau Lobato, Bairru Pité, Dili.

“Montante dólar milliaun atus ida lima nulu ne’ebé aprova hosi Parlamentu Nasional ba fulan tolu la to’o atu hasa’e kresimentu ekonómiku ida ne’ebé ita hotu hakarak. Prezidente Repúblika fiar katak Governu Daualu halo ona planu ba rekuperasaun sosiál no ekonómika no hahú ona prepara Orsamentu Jerál Estadu ba tinan ida ne’e no ba tinan oin,” dehan Xefe Estadu, kuarta ne’e,

Prezidente-Repúblika konsiente katak atividade ekonómika rai laran ladún la’o, produtu internu brutu mós tun, no relatóriu anuál hosi ita-nia Banco Central fó-sai katak ekonomia hahú sa’e uitoan iha tinan kotuk maibé iha tinan ida ne’e tun ba pursentu ida (1%).

Aman ba nasaun ne’e esplika, ekonomia tun tanba fatór lubun ida makhanesan Orsamentu Jerál Estadu xumba iha Parlamentu Nasionál no obriga Estadu moris ho rejime duodésimu de’it; udan boot ne’ebé afeta uma-kain lubun ida iha Kapitál Dili no iha munisípiu balun; maluk barak tenke hapara sira-nia atividade fila-liman hodi bele hadook-aan hosi moras COVID-19.

“Fatór sira ne’e hotu afeta tebes ita-nia ema-sira ne’ebé moris hosi sira-nia negósiu ki’ik, médiu no boot. Ho rendimentu ne’ebé ki’ik ka menus, família-sira lakon kbi’it hodi sosa ai-han no produtu sira seluk ne’ebé presiza loro-loron,” nia dehan.

Nia hatutan, haree ba situasaun susar ida ne’e, mak VIII Governu Konstitusionál aprova no hahú ona implementa Pakote Ekonómiku, ho kuaze milliaun $150, hodi responde ba moras COVID-19 no estragu sira hosi udan bo’ot foin lalais ne’e ninia konsekúensia ba Povu TL, iha aspetu ekonómiku-sosiál.

Pakote Ekonómiku ida ne’e, Prezidente Repúblika dehan, ninia objetivu mak atu apoia uma kain ho rendimentu ki’ik liu $500 kada fulan no evita empreza sira taka sira-nia atividade komersiál ka hatún saláriu ka hasai traballadór sira.

Nu’udár Prezidente Repúblika fó hanoin katak, importante hotu-hotu hatene katak Pakote Ekonómiku ida ne’e mak hahalok dahuluk atu hamenus Povu-nia susar balun iha períodu emerjénsia maibé la’ós resposta ba problema hotu-hotu iha rai laran.

“Ha’u fiar no ita hotu-hotu fiar no hanoin katak importante tebes hala’o fila-fali ita-nia ajenda reforma sosiál no ekonómika atu ita bele hakbiit no sustenta ita-nia ekonomia atu buras babeibeik. Ita-nia Estadu labele kontinua funsiona de’it ho rejime duodésimu. Rejime duodésimu nu’udar rejime tranzitóriu ida ezekusaun orsamentál nian ne’ebé garante, ba tempu badak, funsionamentu servisus públikus, enkuantu ita la iha Orsamentu Jerál Estadum,” PR espresa.

Ho kresimentu ida ki’ik, nia hateten, Timor-Leste hatudu katak ekonomia lakon kbi’it, tanba ne’e tenke rekupera fila-fali atu fó konfiansa ba ajente ekonómiku-sira hotu, urjente tebes halo rekuperasaun sosiál no ekonómika.

“Atu bele la’o ba oin ho susesu, ita presiza fó atensaun boot liu ba kapitál umanu tanba ita-nia ema mak rikusoin boot liu ne’ebé Timor-Leste iha. Hanesan ezemplu, ha’ u temi de’it kona-ba nesesidade atu kapasita ita-nia ema iha área saúde. Importante tebes kapasita sira ho padraun internasionál atu ita-nia profisionál sira bele fó prestasaun servisu saúde ho kualidade aas no hatene fó kedas resposta adekuadu bainhira surtu moras mosu derrepente,” nia fó hanoin.

Notísia Relevante: EE Besik Ramata, PR Alerta ‘Matan Moris’ Nafatin

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here