Brigadeiru Jenerál João Miranda "Aluc Descartes". Imajen/Egas Cristovão

DILI, 20 maiu 2020 (TATOLI) – Governu Timor-Leste liuhusi Sala Situasaun Sentru Integradu Jestaun Krize (CIGC-sigla Portugés), hato’o parabéns ba povu Timor-Leste tomak ne’ebé koopera ho estadu no ekipa médiku hotu iha Timor-Leste hodi luta kontra ameasa surtu coronavirus ka COVID-19 ho susesu.

Notísia Relevante : COVID-19, Ema iha Kuarentena Hela Na’in-44

Segundu Komandante Operasionál CIGC, Brigadeiru Jenerál João Miranda “Aluc Descartes” lori governu Timor-Leste nia-naran hato’o mós agradese ba ekipa médiku, Polísia Nasionál Timor-Leste (PNTL), FALINTIL-Forsa Defeza Timor-Leste (F-FDTL) ho órgaun komunikasaun sosiál no jornalista sira hotu ne’ebé apoiu serbisu tomak luta kontra propagasaun surtu COVID-19.

“Parabéns ba ema hotu ne’ebé serbisu iha liña oin iha luta kontra COVID-19 no parabéns ba povu Timor-Leste tomak,” hateten Brigadeiru Jenerál, João Miranda “Aluc Descartes” liuhusi konferénsia imprensa iha Sentru Mídia CIGC iha Sentru Konvensaun Dili (CCD), kuarta (20/05/2020).

Timor-Leste sente orgullu tebes, tanba sura husi loron 21 marsu 2020 ne’ebé Timor-Leste deteta kazu COVID-19 konfirmadu pozitivu husi sidadaun estranjeiru ida (1) no sa’e to’o kazu konfirmadu pozitivu ba ema na’in-24 no provavel haat (4) iha loron 24 abríl 2020. Nune’e, Sentru Integradu Jestaun Krize iha koordenasaun servbisu ho Ministériu Saúde (MS) no ekipa inter-ministeriál sira, liu-liu ho apoiu ekipa profisionál Saúde no kooperasaun di’ak tebe-tebes husi povu tomak hodi fó susesu ba vitória luta kontra COVID-19.

“Ho apoiu no povu tomak nia kontribuisaun maka ita konsege kontein no deklara zero ba kazu pozitivu no la rejista ema mate iha ita nia rain,”  hateten Komandante Aluc.

Aluc hatutan, esforsu no susesu ida ne’e rejista iha istória Timor-Leste nian, katak rejista para manan no ohin Timor-Leste deklara ho susesu katak manan tan susesu ida luta kontra moras ne’ebé akontese iha mundu tomak.

“Ita manan no liu ona faze dahuluk iha luta kontra COVID-19 iha Timor-Leste. Maske nune’e, tuir ita nia peritu sira-nia analiza no informasaun ne’ebé Organizasaun Mundiál Saúde (OMS) fó sai, katak surtu ida-ne’e seidauk lakon iha mundu no Timor-Leste tenke organiza-aan no preparadu liután atu hasoru iha ondas daruak hanesan país sira seluk halo,”  Aluc hateten.

Sentru Integradu Jestaun Krize mós avalia hela daudaun serbisu sira ne’ebé presta ona durante besik fulan rua nia -laran, no sei submete ba Komandu Operasionál no inter-ministeriál hodi tetu no deside pasu sira tuir mai hafoin Estadu Emerjénsia.

Aluc hatutan, luta kontra COVID-19 iha mundu tomak no iha Timor-Leste konsidera hanesan mós Timor-Leste nia prosesu iha luta ne’ebé lori tinan rua-nulu resin haat (XXIV) to’o hetan independénsia no lori tinan sanulu resin ualu (XVIII) harii nasaun no sempre manan, tanba TL nia povu nia unidade no povu nia kontribuisaun.

Komandante Aluc  mós husu ba povu Timor-Leste tomak atu kontinua akompaña no apoiu esforsu hotu-hotu ne’ebé estadu sei hola iha tempu sira tuir mai iha kombate ba COVID-19. Esforsu hirak ne’e so posivel bainhira Timoroan hamutuk, no hamutuk ho dixiplina. Tanba so nune’e de’it mak Timor-Leste bele rejista dala ida tan vitória foun iha luta kontra COVID-19.

Ikus liu lori naran ekipa CIGC, Brigadeiru Jenerál, “Aluc Descartes” hato’o parabéns ba povu Timor-Leste ne’ebé selebra Aniversáriu Restaurasaun Independénsia ba dala-XVIII, 20 maiu 2020-2020.

Jornalista     : Eugénio Pereira

Editór            : Francisco Simões

HAKEREK NO HATÁN

Please enter your comment!
Please enter your name here