Eskritór, Lia-Na’in, no Filózofu, Elidio Agusto Guterres. Imajen Espesiál.

Hosi: Elidio Agusto Guterres. S. Fil. M. Phil*)

Coronavirus alias kutun corona (COVID-19), pendemia ida ne’ebé hamate ema rihun ba rihun iha mundu ne’e. Pandemia COVID-19, hatun forsa modernizasaun teknolojia ne’ebé mundu tomak gava ho teknolojia 4.0. Simplesmente ita bele dehan COVID-19 sai liurai “mate” nian iha tempu modernu ida-ne’e.

La presiza tinan tomak, COVID-19, harahun sistema governasaun iha mundu. Krize ekonomia mosu iha nasaun barak. Edukasaun falla. Aktu ispirituál relijiaun hotu-hotu hanesan misa dominggu, misa paskua (Kristaun), fulan ramadan (musulmanu) no seluk tan, la hala’o hanesan tempu baibain.

Surtu COVID-19 mós hatun forsa no matenek médiku sira ho nia teknolojia moderna. Nia [COVID-19) hatun forsa “gaib” ne’ebé bele kura moras hotu. Surtu COVID-19, hanesan “liurai mate nian” ne’ebé harahun no oho ema ho silénsiu no neineik. Mundu tomak lakon no hakribit tiha COVID-19 nia oin. Hatudu forsa iha nia oin, ita sei lakon. Dalan di’ak ita bele kombate mak distánsia sosiál ka distánsia fizika.

Dalan di’ak atu hala’o distánsia sosiál ka distánsia fizika ho susesu mak lockdown ka estadu emerjénsia. Nasaun barak mak implementa sistema ida-ne’e inklui Timor-Leste. Dezde fulan marsu 2020, bainhira eis Ministra Saúde Interina, dra. Elia dos Reis Amaral, deklara ema ida pozitivu COVID-19, iha loron 21 fulan-marsu 2020, Prezidente Repúblika liuhosi Dekretu Prezidensiál Nú. 29/2020 deklara Estadu Emerjénsia durante loron-30, hahú hosi oras 00.00 hosi 28 marsu 2020 to’o oras 23.59, 26 abríl 2020 no Estadu Emerjénsia períodu daruak to’o 26 maiu 2020.

Estadu emerjénsia, aktu di’ak ne’ebé Governu foti atu kombate no prevene COVID-19 iha nasaun Timor Leste. Povu hotu-hotu hela iha uma (stay at home). Funsionáriu sira Work from home (WHF) alias serbisu hosi uma. Maibé, serbisu hosi uma ba sira ne’ebé funsionáriu. Oinsá ho povu ai-leba? Just stay at home! Povu la ko’alia barak. Povu simu desizaun ida-ne’e ho liman rua. Povu fiar katak Governu sei prepara no apoiu sira-nia nesesidade bázika. Maibé realidade hatudu, Governu falla foti desizaun hodi haree povu nia nesesidade ho lalais. Povu barak mak hamlaha tanba laiha rendementu ne’ebé sufisiente atu sustenta moris.

Atu responde preokupasaun ne’e, Governu deside renumerasun pulsa eletrisidade gratuita ba uma-kain sira, ajuda selu pursentu 60 ba saláriu traballadór sira, subsídiu $100 kada uma-kain, fó netik esperansa responde preokupasaun povu durante Estadu Emerjénsia. Maibé, Governu falla. To’o iha ne’e, ha’u iha sentimentu morál atu krítika Governu ba implementasaun subsídiu $100 kada uma-kain ne’ebé tarde. Ida-ne’e, la signifika Governu haluha povu maibé falla iha hanoin atu hala’o programa subsídiu ho sentimentu no emerjénsia (urjente).

Subsídiu $100 no Aktu Sosiál Entre Sosiadade

Subsídiu $100 kada uma-kain, aktu ne’ebé di’ak hosi Governu atu rezolve problema ne’ebé povu enfrenta durante Estadu Emerjénsia. Povu kontente hein promesa hosi Governu. Povu ai-leba ne’ebé hamlaha, kalan toba la dukur hein loron 15 maiu atu simu $100 hodi sosa netik nesesidade bázika, maibé mehi povu ai-leba ida ne’e sai mehi ne’ebé la sai realidade. Subsídiu $100 ne’ebé Governu promete sei iha prosesu nia laran. La sente, Estadu Emerjénsia baze dahuluk ramata ona no baze daruak besik atu ramata, maibé prosesu seidauk to’o nia rohan. Ida-ne’e hatudu mehi povu ai-leba ne’ebé hamlaha sei naruk.

Perguntas simples ne’ebé ita povu ai-leba husu mak tanba saida mak subsídiu $100 mai tarde? Bainhira mak prosesu ne’e to’o nia rohan? Perguntas simples ida-ne’e sai lian halerik ita povu ai-leba ne’ebé Governu presiza rona no hatán iha tempu badak nia laran. To’o iha ne’e ita presiza krítiku uitoan ita-nia Governu. Na’i-ulun sira tenke iha sentimentu morál no mentalidade sosiál atu rona no haree povu nia halerik tan terus iha situasaun Estadu Emerjénsia.

Deputadu sira ne’ebé tuur iha uma fukun Parlamentu Nasionál tenke hatutan povu nia halerik. Nu’udar reprezentante povu, deputadu/a sira tenke hatene “moe” atu dehan povu la hamlaha durante estadu emerjénsia (jelera nakonu ho paun no keju, dapur nakonu ho fó). Ida-ne’e la’ós realidade ba povu nia moris loro-loron. Ida-ne’e, imajen dapur hosi deputadu sira-nian. Povu hamlaha la’ós asumsaun ne’ebé harii ho sentimentu polítiku. Hamlaha realidade ne’ebé povu ai-leba enfrenta duni. Tanba ne’e, tenke hatene-aan katak imi mak ami povu kbiit laek sira-nia reprezentante. Tuir dalen Maláiu dehan, “Kalian adalah wakil rakyat, bukan rakyat. Kami adalah rakyat dan kalian adalah wakil rakyat”.

Durante Estadu Emerjénsia iha períodu primeiru to’o agora (períodu segundu) ne’ebé besik ramata ona, iha mós aktu sosiál lubuk ida entre povu ba povu. Povu ne’ebé iha forsa, ajuda maluk sira ne’ebé enfrenta hamlaha durante Estadu Emerjénsia. Tulun ka apoiu sira mesak simples maibé iha kualidade “domin” ne’ebé kle’an hatene maluk ai-leba nia susar no terus. La presiza tempu naruk atu hala’o aktu sosiál. Povu iha mentalidade emerjénsia no iha sentimentu no hanoin urjente atu ajuda. Ba ha’u, aktu sosiál entre povu ba povu tenke sai ezemplu ba Governu, tau mentalidade emerjénsia iha prosesu realiza fó subsídiu $100 ba kada uma-kain (família).

Se ita haree ba kotuk, povu enfrenta ona krizi ekonomia dezde mosu impase polítika tinan rua liubá. Durante impase polítika povu mós enfrenta inundasaun iha Dili no fatin sira seluk ne’ebé habelar krize ekonomia iha moris sosiedade, no agora povu hela iha krije COVID-19 ne’ebé hamosu Estadu Emerjénsia. Realidade sira-ne’e hatudu momoos katak povu ai-leba susar duni. Povu ne’ebé hela hamutuk iha sosiedade haree no hatene realidade terus ne’ebé nia maluk seluk enfrenta. Sira sai sasin rasik ba terus ida-ne’e. Ita bele dehan, tanba ida-ne’e aktu sosiál entre sosiadade sulin hanesan bee durante Estadu Emerjénsia duké subsídiu hosi Governu ne’ebé ninia prosesu sei naruk. Realidade ida-ne’e simbólu falta Mentalidade Emerjénsia atu responde povu ai-leba nia preoukupasaun sira.

Ita hotu hatene, Governu iha nia sistema no prosedural ne’ebé naruk bainhira atu hala’o buat ruma. Maibé iha tempu Estadu Emerjénsia, ne’ebé halo povu barak hamlaha, la’os razaun ne’ebé fundamentu ba subsídiu ne’ebé tarde to’o iha povu nia liman. Sistema Governu mak halo. Sira iha forsa no dalan atu habadak ou hanaruk prosesu. Iha situasaun emerjénsia, Governu tenke iha hanoin no sentimentu urjente atu haree no hasai povu hosi situasaun defisil (hamlaha) ida-ne’e. Dala ida tán, Governu tenke iha Mentalidade Emerjénsia atu hatene no sente povu nia terus.

Subsidiu $100 no Justisa Sosiál

Iha mídia ita haree no rona, ema barak mak halo krítika lubuk ida ba programa subsídiu $100 ho justisa sosiál. Barak mak haree subsídiu sosiál ne’ebé Governu fó la justu. Aktu sira ne’e laiha nia valór justisa sosiál. Maibé realidade hatudu katak povu ai-leba la mete ho justisa sosiál. Sira hein no hein de’it bainhira mak subsídiu $100 ne’e to’o iha sira-nia liman hodi sustenta moris.

Ko’alia justisa sosiál liga ba subsídiu Governu ne’e la sala. Maibé tuir ha’u-nia hanoin, iha Estadu Emerjénsia la’os tempu ne’ebé di’ak atu ko’alia kona-ba justisa sosiál. La’ós la presiza atu ko’alia maibé tuir ha’u-nia hanoin ita presiza liu mak ko’alia kona-ba bainhira mak subsídiu ne’e to’o lalais iha povu nia liman molok Estadu Eemrjénsia ramata hodi sustenta netik sira-nia moris. Iha tempu ida hanesan ne’e, ba ha’u, ita tenke ko’alia kona-ba prosesu subsídiu ne’ebé presiza tempu naruk.

Tenke haree dalan saida mak di’ak liu atu bele prosesu subsídiu ne’e ho lalais. Sistema, Governu mak halo. Sira bele habadak tempu ka bele hanaruk tempu. Iha situasaun ida hanesan ne’e, habadak tempu prosesu subsidiu dalan murak mean ida ne’e tenke ita liu. Dadus sensu bele ita haree ho hanoin urjente. Tenke halo kooperasaun ho liña hotu-hotu hodi hadook mentalidade korrupsaun. Sira ne’ebé halo aktu korrupsaun sei hetan pena prizaun.

Iha parte ida-ne’e, ita presiza estuda hosi nasaun Indonézia ne’ebé fó lalais subsídiu ba nia povu no fó orden pena prizaun ba ema ne’ebé halo aktu korrupsaun ba orsamentu subsídiu. Prezidente Indonézia, Jokowi, foti desizaun ida-ne’e tanba iha mentalidade emerjénsia ho hanoin no sentimentu urjente atu haree povu nia halerik iha tempu pandemia COVID-19 ne’e.

Problema boot ne’ebé povu enfrenta agora la’ós justisa sosiál maibé hamlaha tanba menus rendimentu ekonomia durante Estadu Emerjénsia. Tanba ne’e, Governu tenke iha hanoin atu habadak prosesu subsídiu. Tenke haree prosesu ida-ne’e ho hanoin umanizmu la’ós polítiku. Satán, ita enfrenta hela polemika polítika (impase polítika) durante tempu naruk nia laran. Iha ne’e, tenke iha Mentalidade Emerjénsia atu haree povu nia terus. Tenke iha hanoin no sentimentu urjente bainhira rona povu nia halerik tan terus no hamlaha.

Subsídiu $100 ne’e mai tarde la’ó tanba justisa sosiál maibé tanba Governu falta Mentalidade Emerjénsia atu heree povu nia terus. Laiha hanoin no sentimentu urjente atu habadak prosesu subsídiu fó ba povu ai-leba. Povu la preokupa ho justisa sosiál maibé hakilar tanba hamlaha durante Estadu Emerjénsia. Tanba ne’e, mai ita haree no fó hanoin (krítika) ba prosesu subsídiu ne’ebé naruk. Governu ne’ebé iha autoridade loke neon atu habadak prosesu hodi responde povu nia preokupasaun–Imi-nia desizaun di’ak mak ami-nia osan-mean.

*) Hakerek Na’in Alumni Universitas Gadjah Mada (UGM) Yogyakarta, Indonézia

HAKEREK NO HATÁN

Please enter your comment!
Please enter your name here