Imajen Espesiál.

DILI, 20 maiu 2020 (TATOLI)—Relasiona ho deputadu na’in-haat (4) hosi Bankada Partidu Demokrátiku (PD) iha Parlamentu Nasionál, horisehik, kuadru PD balun husu Prezidente Partidu, Mariano ‘Assanami’ Sabino, atu urjentimente konvoka Kongresu Estraordinária.

“Husu ba Prezidente PD atu konvoka urjentimente Kongressu Estraordinária tuir artigu 38 pontu 4 ne’ebé hatete katak Kongresu Nasionál Estraordináriu sei halo bainhira iha razaun ne’ebé justifikadu no partidu hasoru situasaun polítika estraordináriu iha partidu laran no situasaun polítika nasionál estadu nian,” Komisáriu Polítiku Rejionál Partidu Demokratiku, Queiros UMU-CHEGE, informa liuhosi Konferénsia Imprensa, iha sede Kolmera, kuarta ne’e.

Komisáriu Polítika Rejionál ne’e afirma, haree ba lala’ok polítiku ne’ebé mosu iha Parlamentu Nasionál, hatudu momoos katak ita-nia prosesu demokratizasaun sei nurak tebes, tanba ne’e presiza komponente hotu-hotu atu servisu maka’as liután hodi bele hametin demokrasia iha Timor-Leste.

Partidu Demokrátiku (PD) nu’udar partidu polítiku ne’ebé komunga prinsípiu demokrasia, solidaridade, justisa sosiál, anti konfrontasaun no antí violénsia ho kualkér grupu no entidade polítiku ne’ebé konsagra iha Estatutu Orgániku Partidu Demokrátiku artigu 4, pontu 2,3,4 no 5.

Nia dehan, aktu polítiku ne’ebé hatudu hosi deputadu PD na’in-4 iha Parlamentu Nasional, kuadru no militante Partidu Demokrátiku, ohin, 20 maiu 2020, deklara la konkorda no la aseita asaun polítiku ne’ebé halo hosi deputadu PD iha Parlamentu Nasionál ne’ebé kontráriu ho desizaun koletivu ne’ebé deside iha Konferénsia Nasionál iha loron 20 fevereiru 2020.

“Aktu polítiku ne’e la reprezenta aspirasaun kuadru no militante PD tuir artigu 37 iha Estatutu Orgániku Partidu Demokrátiku. Husu responsabilidade individuál Prezidente PD ne’ebé fó orientasaun ba deputadu PD sira atu kontra desizaun konferénsia nasionál,” hateten Komisáriu Polítiku Rejionál PD ne’e.

Partidu Demokrátiku mantein no firme nafatin ho desizaun koligasaun ne’ebé halo liuhosi konferénsia nasionál bazeia ba artigu 55 rejimentu internu PD nian.

Komisáriu Polítiku Rejionál PD ne’e husu ba kuadru, militante no simpatizante Partidu Demokrátiku atu mantein disiplina, hakmatek, kria pás no estabilidade, kumpri nafatin regras estadu emerjénsia.

Konferénsia imprensa ne’e partisipa hosi koordenadór PD munisípiu balun no estrtura nasionál balun.

Notísia Relevante: Aniceto Guterres Eleitu Ba PPN, PD Apoia ho Votu 4

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here