Kompania Emanuel Milenial fo apoiu nesesidade baziku ba populasaun sira iha Munisipiu Aileu.Imajen/Kompania EM.

DILI, 20 maiu 2020 (TATOLI)-Kompañia Emanuel Mileniál Unipessoál Lda, iha loron 18 fulan-maiu 2020 apoiu ona nesesidade báziku ba populasaun uma-kain hamutuk 60 iha Munisípiu Aileu.

Diretóra Kompañia Emanuel Mileniál, Libania Martins Amaral, hateten nia parte fó apoiu sasán nesesidade báziku hanesan foos, mina bimoli no supermi ba benefisiáriu husi Suku Aisirimou, Postu Administrativu Aileu Vila hamutuk uma-kain 20.

Iha Postu Suku Namoleu uma ka’in 20, Suku Asubilitiho uma-kain 10 no Suku Bereleu uma-kain 10.

“Asaun karidade ne’e , ha’u realiza mai husi ha’u nia konsénsia rasik hanesan Timoroan no Aileu oan ida mós tanba iha situasaun estadu emerjénsia ne’e. Ha’u haree maluk Aileu barak infrente menus aihan, nune’e hanesan umanu ha’u iha nesesidade báziku oituan ajuda maluk sira, maski la barak, pelumenus ajuda netik há’u nia maluk sira ne’ebé presiza duni,”dehan nia liuhosi komunikadu imprensa ne’ebé maka TATOLI, asesu tersa (19/05/2020).

Kada uma ka’in hetan foos killograma 10, mina bimoli litru ida, supermi hodi responde problema menus aihan ne’ebé maka komunidade sira enfrenta durante implementasaun Estadu Emerjénsia (EE).

“Nesesidade báziku ne’ebé apoiu kada uma-kain, ho foos kilograma 10, mina bimoli litru ida, supermi dos haat ba uma-kain 60 ho foos saka 15 ba Movimentu Solidaredade Aileu Anan, nune’e sira bele apoiu ba povu kbi’it la’ek sira iha área rural,” tenik tan.

Iha fatin hanesan benefisiáriu, João Vila Nova, reprezentante benefisiáriu sira hato’o agradese wa’in ba kompañia Emanuel Mileniál.

“Apoiu ne’e hakmaan netik ami-nia nesesidade moris, no husu ba Aman-Maromak kontinua fó vida naruk ba Kompañia Na’in ho nia atividade ,” katak nia.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here