Hosi: Aniceto Guro-Berteni Neves
(Traballadór iha Fakuldade Siénsia Sosiál – UNTL)

Artigu ida-ne’e nu’udar ha’u-nia reflesaun pesoál ba komemorasaun loron Restaurasaun Independénsia Nasionál ba dala sanulu resin-ualu: 20 fulan-Maiu 2002–2020. Artigu ne’e, liuliu dedika ba foinsa’e sira ne’ebe agora daudaun estuda hela, ho konfuzaun buka deskobre razaun ka motivasaun polítika hosi polémika, diskusaun, debate no diskursu (wacana, discourse) – sira sobre impasse Governasaun to’o kebra konseitu Estadu Falladu (Failed State, Negara gagal) no Estadu Anarkizmu (Anarchism State).

Iha terminolojia rua ne’ebé kaer ba malu: impase polítika versus impase governasaun. Ha’u-nia opiniaun, maski hosi aspeitu terminolojia, konseitu rua ne’e diferente maibé refleta ba situasaun atuál, ko’alia kona-ba impase polítika refere ba funsionamentu partidu polítiku sira-nian iha formasaun Governu Dahitu no Daualuk nian no debate sira kona-ba futuru IX Governu. Konseitu impase Governasaun ka Governativa refere ba dis-funsionamentu Governasaun atu presta servisu públiku, atende populasaun liuhosi halo dezenvolvimentu iha setór oin-oin inklui dezenvolvimentu sosiál, ekonomia, kultura, polítika, seguransa, defeza, justisa, nsst.

Dezde hahú kedas iha faze post eleisaun jerál tinan 2017 ne’ebé prodús VII-Governu Konstitusionál, tuir kedas iha tinan ne’e, Prezidente Repúblika, Francisco Guterres Lú Olo deside disolve Parlamentu Nasionál hodi hakat ba Eleisaun Antesipada tinan 2018. Iha-ne’e kedas Timor-Leste tama iha situasaun ida-ne’ebé agora familiár ho impase polítika ka impase Governasaun. Iha momentu ne’ebá, partidu polítiku sira hotu konkorda katak só Eleisaun Antesipada de’it mak nu’udar solusaun ba impase polítika ka impase Governasaun. Realmente Eleisaun Antesipada iha tinan 2018, la’ós solusaun, maibé kontinua kria situasaun ne’ebé hanesan to’o ita komemora loron Restaurasaun Independénsia Nasionál ba dala sanulu resin-ualu (20 fulan-Maiu 2002-2020.

Timor-Leste nu’udar Nasaun/Estadu kontinua enfrenta impase polítika ka impase Governasaun. Partidu CNRT, PLP ho KHUNTO ne’ebé forma Aliansa Pre-Eleitorál ‘Aliansa Mudansa ba Progressu (AMP-2018) manán maioria absoluta no iha elijibilidade eleitorál hodi forma VIII-Governu Konstitusionál. Realmente, Partidu CNRT nu’udar na’in mós ba VIII Governu Konstitusionál ne’e vota kontra no abstain hodi rezulta Orsamentu Jerál Estadu-nian xumba iha Parlamentu Nasionál iha fulan-Janeiru 2020.

P-CNRT sees kedas hosi VIII Governu Konstitusionál ne’e, konvida Partidu Demokrátiku, Partidu UDT, Frenti-Mudança, PUDD no Partidu KHUNTO forma Aliansa foun ida, ikusmai tanba laiha serteza ka laiha futuru hosi aliansa foun ne’e, Partidu KHUNTO dada-an sai tiha no deside mantein iha VIII Governu Konstitusionál. Partidu KHUNTO nu’udar mós na’in ba VIII Governu Konstitusionál ne’e. Partidu Demokrátiku konfuzaun: kontinua mantein maibé laiha serteza. Partidu FRETILIN deklara kompromisu atu viabiliza VIII Governu Konstitusionál to’o ramata, Partidu Demokrátiku iha konfuzaun nia laran, maibé pratikamente iha destituisaun meza Prezidente Parlamentu Nasionál fó votu haat hodi afavór (votu 40) ba pedidu Partidu FRETILIN-PLP no KHUNTO nian ba destituisaun meza Prezidente Parlamentu Nasionál Señor Arão Noe. Signifika, atu sai hosi konfuzaun ne’e, Partidu Demokrátiku prefere fila hakuak fali PLP no P-KHUNTO hamutuk ho Partidu FRETILIN viabiliza de’it ona VIII Governu Konstitusionál ne’ebé lidera hosi Primeiru-Ministru, Taur Matan Ruak. Realmente, AMP-2020 mós la’ós solusaun ba impase polítika ka impase governasaun ne’e.

Partidu CNRT dezafia aktu polítiku Prezidente Repúblika nian no rekere ba Partidu FRETILIN, PLP no Partidu KHUNTO tenke halo konferénsia hodi formaliza koligasaun ne’e. Se dalan ne’e mak lejítimu, karik Partidu Demokrátiku mós sei halo tuir rekerimentu P-CNRT nian. Partidu sira-ne’e hotu kesi-an ho Lei Partidu Polítiku no Lei Eleitorál. Petisaun Partidu CNRT nian dahuluk hetan rejeisaun hosi Tribunál Rekursu iha faze prosesuál no advogadu privadu Partidu CNRT nian Manuel Tilman submete ona petisaun daruak. Públiku hotu hein desizaun órgaun Judisiál Tribunál Rekursu nian. Liga ho destituisaun meza Prezidente Parlamentu Nasionál loron 19 fulan-Maiu 2020, Partidu CNRT la simu, sei hato’o keixa ba Tribunál. Iha sorin seluk, PLP, Partidu FRETILIN no Partidu KHUNTO mos sei hatama keixa ba tribunál sobre aktu impedimentu ba pedidu destituisaun ne’e. Keixa rua ne’e tribunál mak sei hala’o knaar tuir lei haruka.

Pergunta importante ba ita-nia reflesaun mak ne’e: seráke petisaun daruak Partidu CNRT nian no keixa ba pedidu destituisaun ne’e implika ba realizasaun kompeténsia própria Prezidente Repúblika nian nu’udar Komandante Supremu F-FDTL no kompeténsia garantia funsionamentu regulár no efetivu instituisaun-sira Estadu nian? Interesante atu buka hatene no halo explorasaun tan. Pergunta reflesaun ne’e ha’u husik hela ba leitór-sira ka públiku mak hatán ka responde. Ha’u espera katak alin sira universitáriu hosi UNTL ka universidade sira seluk bele asesu ba artigu ne’e no halo diskusaun hodi buka rasik resposta ka forma rasik sira-nia prepozisaun ho independente. Tuir ha’u, se hein to’o Tribunál deside petisaun daruak no keixa hirak-ne’e, signifika impase polítika ka impase governasaun ne’e sei to’o desizaun tribunál ne’e fó-sai. Depois mak loke dalan ba medida seluk hodi hakotu situasaun ne’e.

Iha diskusaun sira iha mídia privadu no mídia estatál (televizaun, rádiu, jornál inklui mídia sosiál). Mosu opiniaun rua ne’ebé iha kontraditóriu: ida; Prezidente Repúblika disolve Parlamentu Nasionál hodi hakat ba Eleisaun Antesipada daruak, no; rua; viabiliza funsionamentu VIII Governu Konstitusionál ka formasaun IX Governu Konstitusionál. Kona-ba Eleisaun Antesipada daruak, hosi P-CNRT, liuhosi Maun-Boot Kay Rala Xanana Gusmão halo afirmasaun ida katak solusaun justu no demokrátiku ba impase polítiku ka impase governasaun ne’e mak Eleisaun Antesipada daruak ka eleisaun ida tan.

Partidu CNRT liuhosi deputadu sira konfirma katak rejeita prosesu no rezultadu destituisaun meza Prezidente Parlamentu Nasionál. Tuir ha’u-nia opiniaun, destituisaun meza Prezidente Parlamentu Nasionál ne’e impede opsaun solusaun justa no demokrátika ne’e. Se obrigadu, Prezidente Repúblika deside disolve Parlamentu Nasionál depois VIII Governu Konstitusionál sai Governu caretaker, Primeiru-Ministru caretaker tenke lori proposta orsamentu Eleisaun Antesipada daruak-nian ba Parlamentu Nasionál. Ha’u bele espékula katak deputadu/deputada maioria hosi Partidu FRETILIN, PLP no Partidu KHUNTO aumenta votu fahe hosi Partidu Demokrátiku, maka proposta orsamentu ba Eleisaun Antesipada ka eleisaun seluk ida fali ne’e sei la bele pasa. Ne’e katak senáriu ka opsaun Eleisaun Antesipada daruak ne’e senáriu hodi hanaruk-tan de’it impase polítika ka impase governasaun. Rezultadu ne’ebé mak partidu politiku-sira hotu prodús mak vinga-malu, sukit-malu, no kontribui ba eskluzaun no divizaun komunál ho baze interese partidu politiku-nian. VIII Governu Konstitusionál sai caretaker to’o Eleisaun Prezidensiál 2022 no Eleisaun Jerál 2023.

Kuandu situasaun hirak-ne’e akontese, pergunta reflesaun daruak mak ne’e: Seráke Timor-Leste tama iha Estadu Falladu no Estadu Anarkizmu?

Sientista sira barak tebes mak define ida-idak nia karaterístiku ka indikadór atu sukat Estadu ida tama iha kategoria Estadu Falladu no Estadu Anarkizmu. Refleta hosi literatura Siénsia Sosiál, no esperiénsia Nasaun-Estadu sira seluk iha fatin barak, ha’u-nia opiniaun katak atu konfirma Timor-Leste tama iha Estadu Falladu, tenke iha prova katak Estadu Timor-Leste iha ona faze ida-ne’ebé hatudu daudaun ninia lahuk ka indikasaun falla duni ona tanba LA KONSEGE hakonu obrigasaun prinsipál no labele ona halo defeza ba soberania Estadu ida-ne’e.

Naom Chomsky (2006) identifika natureza rua hodi justifika Estadu ida falla. Primeiru; Estadu laiha boa-vontade no laiha ona kapasidade atu proteje sidadaun hosi violénsia no disturbasaun absoluta. Segundu; Estadu laiha ona kapasidade atu mantein ka proteje direitu fundamentál sidadaun sira iha rai-laran no rai-liur, laiha kapasidade atu hametin no mantein funsionamentu regulár instituisaun sira públiku no demokrasia. Diferente ho Jared Diamond (2005) ne’ebé identifika karaterístiku sira hanesan destruisaun meiu-ambiente, aquecimento globál (global warming), sai inimigu ba malu ho nasaun viziñu, la hetan apoiu hosi sosiedade/komunidade (sosiál, ekonómiku no negósiu), instituisaun sira polítiku, ekonomia, sosiál-kulturál paralizadu totál nu’udar indikadór ba Estadu Falladu.

Iha tinan 2005, organizasaun ne’ebé dedika-an iha área peskiza no edukasaun iha Washington DC, Estadu Unidu Amérika-EUA “Peace Fund”) hamutuk ho Revista Foreign Policy, prodús Index hodi sukat Estadu ida tama iha Estadu Falladu nian. Sira fahe/kategoriza ba indikadór sosiál: Refere ba presaun demográfiku (populasaun aumenta maibé aihan laiha, rai mamuk menus, laiha fatin ba povu sira halo uma hela fatin, ameasadu hosi ambiente/dezastre, nsst). Depois populasaun sira halai sai hosi sira-nia nasaun ba rai ka nasaun seluk (refujiadu iha eskalaun boot). Tanba violénsia masivu (laiha aihan, bee laiha, destruisaun masivu, populasaun moris la seguru tanba Estadu la proteje). Konflitu violénsia akontese entre populasaun nu’udar legasaun hosi istória konflitu-violénsia anteriór (violénsia ho baze divizaun komunál, étniku, rasa, relijiaun, nsst). Imigrasaun ho eskalaun boot (povu sira hili sai bá rai ka nasaun seluk), distorsaun iha atendimentu sosiál (eskola paradu, laiha tratamentu saúde, halo povu sira sofre, moras, ki’ak-mukit, númeru labarik ka ema mate aumenta, laiha fonte ai-han, hemu no hela fatin, nsst. Ekonomia no laiha fonte rendimentu ba hetan ai-han (toos laiha ona, natar laiha ona, balada laiha ona, laiha ona buat ida atu halo ema moris, tendénsia ema sei mate mohu, nsst).

Hosi indikadór polítiku, prova katak Estadu kondisiona (by omission) karateriza-an nu’udar ajente kriminalidade, orientasaun ba delejitimasaun Estadu nian, Estadu lakon sira-nia funsaun, laiha atendimentu públiku ba povu hosi aspetu oin-oin, falla atu proteje sidadaun hosi destruisaun estrutura sosiál sira, violénsia no terrorizmu. Estadu nia ofisiál sira sai autór prinsipál ba aktu violasaun direitu umanu grave no sériu tebes. Governasaun sai ditadura, otoritarian no militár kontrola funsionamentu instituisaun sosiál, kulturál no ekonomia hotu, Estadu hatudu represivu, nsst. Estadu forma nia instituisaun ne’ebé la hakruuk ba lei (ema boot iha lei nia leten), forma grupu milísia ne’ebé Estadu finansia, eziste gerileiru iha ai-laran ka vila-laran, fragmentasaun elite Estadu nian ho elite hosi setór privadu. Intervensaun hosi militár rai-liur nsst.

Se ita uza sientista no indikadór hosi Peace Fund & Revista Foreign Policy iha parágrafu anteriór leten ne’e, pergunta reflesaun tuirmai mak ne’e: Seráke Timor-Leste bele tama iha Estadu Falladu ho impase polítika ka impase governasaun ida agora ne’e? Ida-idak iha razaun no argumentu atu justifika opiniaun. Tuir ha’u-nia opiniaun, maski Timor-Leste enfrenta hela situasaun impase politika ka impase governasaun, maibé situasaun atuál la refleta natureza no indikadór sira hanesan temi iha leten, hodi justifika opiniaun balun nian dehan Timor-Leste tama Estadu Falladu. Opiniaun ne’ebé espalla iha públiku liuhosi kanál televizaun ka mídia sosiál sira katak agora Timor-Leste tama iha Estadu Falladu ne’e la elijível.

Maski petisaun no keixa sira hosi Partidu CNRT nian hasoru Prezidente Repúblika no kontra prosesu no rezultadu destituisaun meza Prezidente Parlamentu Nasionál ne’e konfirma aktu Prezidente Repúblika ne’e kontra Konstituisaun, maibé sei la lori Timor-Leste ba Estadu Falladu. Haree hosi natureza ka indikadór-sira temi daudaun ne’e hatudu katak susar tebes impase polítika ka impase governasaun agora ne’e bele hakonu indikadór Estadu Falladu. Opiniaun ida kebra Timor-Leste nu’udar Estadu Falladu ne’e la pertinente no la lejítimu. Hosi aspetu Konstitusionalidade, Timor-Leste nia Konstituisaun RDTL, prevista mekanizmu legál no polítiku atu asegura funsionamentu Prezidente Repúblika nu’udar Órgaun Soberanu Unipesoál. Atuál VIII Governu Konstitusionál, iha nafatin autoridade legál no polítiku atu garantia funsionamentu instituisaun-sira públiku sosiál, polítiku, kulturál no ekonomia maski la efetivu iha realizasaun sira-nia funsaun.

Se labele ona prova Timor-Leste nu’udar Estadu Falladu, signifika susar-liután atu justifika opiniaun ne’ebé klasifika Timor-Leste nu’udar Estadu Anarkizmu. Tanba maski akontese impase polítika ka impase governasaun, maibé la kondús ba akontese dis-integrasaun sosiál iha komunidade ho masivu. Povu Timor-Leste la konsidera Estadu Timor-Leste fó risku (perigozu) ba vida povu nian. Sim, Estadu iha problema, maibé instituisaun-sira Estadu nian la’ós krize ne’ebé fó perigozu ba sira-nia vida. Ierárkia Órgaun Soberanu-sira no instituisaun-sira Estadu nian la fó ameasa ba funsionamentu instituisaun no órden sosiál, kulturál no ekonomia povu nian. Povu Timor-Leste nia Prezidente Repúblika, Primeiru-Ministru, Prezidente Tribunál-sira, Komandante PNTL no FALINTIL-FDTL la tau an hanesan ho Maromak ka ema ne’ebé halo povu ne’e tenke adora-sira, líder sira la ukun povu maibé serbí povu, no serbí povu mós la’ós ho violénsia. Mezmuke elementu-sira kadavez uza violénsia maibé ne’e akuntabilidade individuál, la meramente karateriza ho Estadu Violentu ka Estadu Anarkizmu.

Diferensia iha interpretasaun ba aspetu Konstitusionalidade no lei-sira, la meramente justifika argumentu sira atu klasifika Timor-Leste nu’udar Estadu Falladu ka Estadu Anarkizmu. Tuir ha’u-nia opiniaun, impase polítika ka impase governasaun ida agora nu’udar fallansu hosi funsionamentu partidu polítiku-sira atu asegura konfiana povu nian liuhosi votu ne’ebé povu fó iha eleisaun jerál. Partidu polítiku-sira kontaminadu tiha interese polítiku ba podér ho interese nasionál. Arogánsia partidu polítiku-sira nian prejuizu ba povu nia vida ekonomia família.

Funsionamentu normál no regulár Órgaun Soberanu Parlamentu Nasionál garantia medida legál polítiku ba hakotu impase polítiku ka impase governasaun. Funsionamentu partidu polítiku-sira ho asentu iha Parlamentu Nasionál, garantia demokrasia nia kualidade no sai ezersísiu ba ezamina maturidade instituisaun-sira Estadu nian no povu nia maturidade (FINAL)!

Parabéns ba Povu Timor-Leste nia aniversáriu tinan 18 komemorasaun loron Restaurasaun Independénsia Nasionál: 20 fulan-Maiu 2002 – 2020. Obrigadu-barak!

Reflesaun 20 fulan-Maiu 2002 – 2020

1 KOMENTÁRIU

HAKEREK NO HATÁN

Please enter your comment!
Please enter your name here