Fórum VII Ázia Pasífiku Dezenvolvimentu Sustentável. Imajen/Espesiál

DILI, 20 maiu 2020 (TATOLI) – Prezidénsia Organizasaun United Nation Economic And Social Commission for Asia and Pacific (UNESCAP) no atuál Ministru Reforma Lejizlativa no Asuntu Parlamentár, Fidelis Manuel Leite Magalhães, prezide Fórum Ázia Pasífiku ba dahitu hodi hili líder foun ba mandatu tinan-ida.

Fórum rejionál ne’e realiza iha Tailándia, kuarta ne’e no Prezidénsia UNESCAP halo ligasaun via telekonferénsia iha Palásiu Governu.

Hafoin fórum iha sensaun dahuluk ne’e ramata, Ministru informa, fórum dahitu UNESCAP nu’udar komisaun ne’ebé trata ba asuntu ekonomia no sosiál ne’ebé involve nasaun sira husi Ázia no Pasífika hanesan Timor-Leste.

“Hafoin loke tiha fórum, iha kedan eleisaun ba Prezidénsia UNESCAP foun no ohin eleitu tiha ona husi Srilanka no nia Vise husi Filipina. Sira maka sei asume fali kna’ar ba Prezidénsia fórum UNESCAP ba mandatu tinan-ida nia laran”, dehan Ministru Fidelis.

Ministru ne’e simu kna’ar nu’udar Prezidénsia UNESCAP, hamutuk ho Vise-Prezidente na’in-12 iha fórum daneen ne’ebé realiza iha Bangkok iha loron 27 to’o 29 2019.

Momentu ne’ebá partisipa husi ema na’in-850, ne’ebé kompostu husi reprezentante governu, organizasaun inter-govermentál, entidade husi Organizasaun Nasaun Unida (ONU), organizasaun internasionál sira, organizasaun sosiedade sivíl sira inklui entidade seluk.

Fidelis informa, sesaun tuirmai sei iha intervesaun hodi haree liu ba dimensaun nasional, rejional no globál relasiona ho ajenda importante ne’ebé ko’alia liu kona-ba dezenvolvimentu sustentável.

“Ita sei ko’alia kona-ba objetivu dezenvolvimentu sustentável inklui modelu ekonomia saida maka país sira devia halo atu nune’e bele lori dezenvolvimentu ne’ebé inklusivu ba sidadaun sira hotu husi períodu agora to’o 2030”, nia akresenta.

Nia mós dehan, iha ninia intervensaun sei foku liu ba hametin liu tan bem estar sidadaun no kapabilidade sidadaun sira nia.

Nune’e mós, sei ko’alia kona-ba harii dezenvolvimentu ekonomia ne’ebé maka sustentável iha país membru sira nobaze ba dezenvolvimentu ne’ebé maka Timor-Leste opta, inklui sistema ai-han ho nutrisaun ne’ebé sustentável ba sidadaun sira, haree mós ba enerjia sustentável dezenvolvimentu no dezafíu iha meiu ambiente.

“Ha’u sei haree ba parte dezenvolvimentu ekonómiku nian ho dezenvolvimentu ne’ebé maka bele lori moris di’ak ka bem estar sidadaun sira, tanba sidadaun maka fatór ba dezenvolvimentu”, nia rekoñese.

Timor-Leste Introdús Involvementu Sosiedade Sivíl Harii Estadu iha UNESCAP

Enkuantu Ministru Fidelis dehan durante Timor-Leste simu kna’ar hanesan Prezidénsia UNESCAP ba tinan ida, konta husi marsu 2019, konsege introdús Sosiedade Sivíl Timor-Leste ne’ebé involve iha prosesu dezenvolvimentu harii Estadu no hetan progressu di’ak tebes ba Timor- Leste.

Tanba iha nasaun balun, Sosiadade Sivíl la hetan fatin hodi halo diskusaun ho sira-nia Governu atu servisu hamutuk.

“Sosiadade Sivíl iha rai balun, sira organiza-an difísil, sá tan organiza hodi ko’alia ho sira-nia Governu iha fórum ida, maibé Timor-Leste iha progresu boot ida tanba Sosiadade Sivíl bele servisu hamutuk ho nia Governu atu kontribui ba harii Estadu ho nune’e ita hetan respeitu husi nasaun tomak nu’udar membru UNESCAP rasik no sira enkoraja ba kestaun ne’e”, nia haktuir.

Parte ida, durante lidera UNESCAP ba tinan-ida, nasaun membru sira apresia servisu Timor-Leste nu’udar nasaun joven ne’e.

“Hatudu ba mundu katak maski nasaun sira iha rejiaun Ázia Pasífiku iha avansu balun maibé parte seluk sei iha dezafíu barak maka rejiaun sira presiza rezolve atu nune’e bainhira to’o 2030 bele iha dezenvolvimentu prosperadade boot liu ba mundu tomak”, nia subliña.

Bainhira rejiaun Ázia Pasífiku maka la dezenvolve desigualdade maka sei iha sub-dezenvolvimentu ka kiak sei prevalese barak liu no iha implikasaun.

“Signifika mundu tomak seidauk konsege halakon kiak no kestaun sira seluk, tanba maioria populasaun husi mundu nian hela iha ita-nia rejiaun hanesan Xina, India, Indonézia, Pakistan, Banglandesh no seluk tan”, nia realsa.

Governante ne’e dehan perante mandatu Timor-Leste, aprezenta hanesan pioneru oinsá atubele aumenta kooperasaun ne’ebe di’ak liu entre país sira ne’ebé la’ós riku no sei infrenta problema rasik iha dezenvolvimentu hanesan koopersaun ba nasaun parte súl sira.

Tuir Ministru Fidelis katak Timor-Leste iha tinan kotuk halo aprezentasaun iha Konsellu Seguransa ONU nian.

“Ita aprezenta kona-ba Timor-Leste nia esprénsia harii nasaun no Estadu, nune’e ita hetan apresiasaun husi Konsellu Seguransa Nasaun Unida rasik. Ha’u hanoin ida ne’e maka ita-nia servisu durante asume kna’ar hanesan Prezidénsia UNESCAP nian”, nia relata.

Jornalista: Natalino Costa
Editora: Julia Chatarina

HAKEREK NO HATÁN

Please enter your comment!
Please enter your name here