Meza Parlamentu Nasionál baku-fila hafoin akontentese dezentendimentu entre deputadu sira. Imajen Tatoli/António Gonçalves

DILI, 20 maiu 2020 (TATOLI) – Fórum Organizasaun  Naun Governamentál Timor-Leste (FONGTIL) rekomenda ba Reprezentante Povu iha Uma-Fukun atu husu deskulpa ba públiku relasiona ho hahalok ne’ebé maka sira hatudu iha loron-rua nia-laran iha sala plenáriu Parlamentu Nasionál (PN), ne’ebé akompaña husi públiku liuhosi rede sosiál.

Diretór Ezekutivu FONGTIL, Daniel dos Santos Carmo, hato’o lia hirak ne’e durante konferénsia imprensa iha Salaun FONGTIL, Caicoli, kuarta ne’e.

Nia nota, aktu Reprezentante Povu hakat liu tiha ona regra demokrátiku ne’ebé tuir loloos sira nu’udar Uma-Fukun ba diálogu no promove edukasaun polítika ba povu.

“Husu ba deputadu no deputada sira atu husu deskulpa publikamente ba hahalok la edukativu maka halo tiha ona iha Parlamentu Nasionál”, Dehan Reprezentante Sosiedade Sivíl ne’e.

Notísia Relevante: Deputadu CNRT Baku-Fila Meza Prezidente Parlamentu Nasionál

Tuir nia, Reprezentante Povu signifika povu maka nain ba ukun, tanba ne’e aktu la maduru iha PN la hatudu reprezentasaun povu.

Daniel subliña, Parlamentu hanesan fatin konsentrasaun polítika la’ós fatin baku malu, tanba ne’e bainhira iha violasaun regra ruma nia dalan atu bele prosesa.

Nia observa, aktu membru Parlamentu sira hatudu la sensível ba problema povu ne’ebé hanesan na’in ba ukun maibé daudaun halerik kona-ba ai-han laiha, rendimentu menus, oan sira labele akompaña eskola online ho di’ak no toos-na’in sira labele transporta sira nian produtu husi toos ba merkadu.

“Parlamentu Nasionál laiha sensibilidade ba problema sosiál ne’ebé povu infrenta relasiona ho impaktu husi COVID-19.

“Ho preokupasaun hirak ne’e ami harak rekomeda atu kontinua funsiona Parlamentu Nasionál ho di’ak hodi ko’alia asuntu sira ne’ebé povu hasoru daudaun. Tanba ne’e, Parlamentu Nasionál presiza rezolve dezentendimentu tuir lei no regra kontitusionál maka relevente la’ós asaltu fíziku ba malu”, nia akresenta.

Entretantu, iha loron 18 to’o 19 maiu, mosu dezentendimentu entre membru Parlamentu sira tanba Bankada FRETILIN, PLP no KHUNTO hakarak debate destituisaun Prezidente Parlamentu Nasionál, Arão Noé de Jesus da Costa Amaral, maibé Bankada CNRT konsidera laiha dalan hodi debate ajenda ne’e.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here