Primeiru-Ministru, Taur Matan Ruak, akompaña ho membru governu sira, debate kona-ba pedidu estensaun ba deklarasaun Estadu Emerjénsia husi Prezidente Repúblika, iha Plenária Parlamentu Nasionál, segunda (27/04). Imajen Tatoli/António Gonçalves

DILI, 20 maiu 2020 (TATOLI) – Parlamentu Nasionál (PN) iha loron 02 abríl 2020 aprova Dekretu PN númeru 14/V, kona-ba autorizasaun ba realizasaun transferénsia estraordinária husi Fundu Petrolíferu ho montante millaun $ 250 no iha loron 6 abríl, Prezidente Repúblika, Francisco Guterres ‘Lú Olo’ promulga.

Husi levantamentu millaun $250, millaun $100 hodi reforsa saldu rezouru, millaun $150 espesífiku ba fundu COVID-19, maibé husi millaun $150 ne’e, PN propoin $500.000 atu dezenvolve polítika no programa iha ámbitu prevensaun no kombate surtu COVID-19.

Ba kestaun ne’e, Diretór Ezekutivu Forum Organizasaun Naun Governamentál Timor-Leste (FONGTIL), Daniel Santos do Carmo, husu ba reprezentante povu sira atu halo fikalizasaun ba implementasaun Fundu COVID-19 ne’ebé Governu aprova ona.

“Husu ba Parlamentu Nasionál atu fiskaliza servisu Governu nian, hodi aselera lalais medida apoiu sosiál no mós pakote materiál maka povu hein hela”, dehan Daniel liuhosi koferénsia imprensa ne’ebé maka hala’o iha salaun FONGTIL, Caicoli, kuarta ne’e.

Notísia Relevante: PN Aprova Pedidu Levantamentu ho Unanimidade

KM Aprova Dekretu-Lei Regula Fundu COVID-19 Millaun $150

Governu rasik estabelese ona Fundu COVID-19 ho montante millaun $150 hanesan fundu autónomu ne’ebé integradu iha administrasaun direta Estadu nian, atu finansia despeza relasiona ho prevensaun no kombate pandemia globál ne’e.

Orsamentu husi fundu ne’e hodi finansia despeza ne’ebé mak relasiona ho akizisaun ai-moruk, materiál, ekipamentu médiku no sasán esensiál sira, inklui instalasaun no manutensaun ba fatin  kuarentena no izolamentu, ho formasaun no operasionalizasaun profisionál ne’ebé envolve iha prevensaun no kombate COVID-19, inklui protesaun sosiál ba vítima husi surtu ne’e no despeza seluk relasiona ho luta kontra COVID-19.

Daniel observa, durante implementasaun Estadu Emerjénsia dahuluk iha loron 26 marsu, Governu konsege halo restrituisaun ba movimentu ema no trasporte liuhosi Dekretu Governu númeru 8/2020 no iha fulan-ida nia laran povu kumpre regra sira, no konsege hases-an husi COVID-19, maibé povu nia sobrevivénsia ameasadu.

“Atu hamenus povu nia terus no susar maka Governu propoin no Parlamentu aprova orsamentu espesiál ida ho montante miliaum $150”, nia akresenta.

Tuir Dirijente ne’e, implementasaun medida sira husi Governu hodi hakmaan povu nia moris maibé to’o oras ne’e medida sira seidauk konsege implementa hotu tanba Governu presiza ajusta buat balun.

Nia mós nota, situasaun ne’ebé akontese iha tersa (19/05) iha PN.

“Deputadu no Deputada sira haluha tiha katak povu hein hela bainhira maka todan ne’ebé sira hetan tanba impaktu husi COVID-19, bele iha resposta”, Daniel subliña.

Maski nune’e, FONGTIL kontinua kongratula esforsu Estadu no Povu Timor-Leste inklui komunidade internasionál tomak nia luta ne’ebé susesu kontra inimigu invizível hanesan COVID-19.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here