Ambiente sala plenáriu hafoin votasaun ba karta destituisaun Prezidente Parlamentu Nasionál, Arão Noé de Jesus da Costa Amaral, iha tersa (19/05). Imajen Tatoli/António Gonçalves

DILI, 19 maiu 2020 (TATOLI) – Prezidente Partidu Congresso Nacional de Reconstrução de Timor (CNRT), Kay Rala Xanana Gusmão akompaña no aseita diskusaun husi Bankada CNRT ho ninia aliadu sira atu hatama keixa ba Tribunál Rekursu tanba konsidera aktu Bankada Frente Revolusionária Timor-Leste Independente (FRETILIN), Partidu Libertasaun Populár (PLP) no K’manek Haburas Unidade Nasionál Timor-oan (KHUNTO) la tuir dalan legál.

Iha enkontru urjente iha sede Partidu CNRT, Bairro dos Grilos, partisipa husi Prezidente Partidu CNRT, Deputadu Bankada CNRT, Membru Governu husi CNRT, Sekretáriu Jerál Partidu Demokrátiku (PD) no atuál Portavóz koligasaun foun, António da Conceição ‘Kalohan’, inklui Deputadu husi Bankada Partidu Unidade Dezenvolvimentu Demokrátiku (PUDD) no União Democrática Timorense (UDT)/Frente Mudansa (FM).

“Ami-nia Prezidente Partidu CNRT, Xanana Gusmão mai tuur hodi rona ami-nia pozisaun atu lori prosesu violasaun asaltu podér husi Bankada tolu (FRETILIN, PLP no KHUNTO) ba Tribunál. Ami lori prosesu ne’e ba Tribunál hodi kestiona legalidade aktu husi Deputadu Bankada tolu ne’ebé hakarak hadau de’it kadeira no la tuir Rejimentu Parlamentu Nasionál nian”, informa Vise-Prezidente Bankada CNRT, Patrocínio dos Reis Fernandes, tersa lorokraik ne’e, hafoin ramata enkontru.

Nia informa, Bankada CNRT ho ninia aliadu sira ne’ebé hamutuk iha bloku koligasaun foun ohin lorokraik hatama ona prosesu ne’e ba Tribunál Rekursu.

“Laiha lei atu fó prazu ba Tribunál halais prosesu, ne’ebé ohin lorokraik ami hatama ona no hein de’it desizaun husi Tribunál”, nia subliña.

Deputadu ne’e apela ba militante no simpatizante partidu CNRT atu mantein kalma hodi akompaña prosesu ne’ebé Bankada CNRT ho nia aliadu hatama ona ba Tribunál Rekursu.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here