José Luís Guterres ‘Lugu’. Imajen Tatoli/Egas Cristovão

DILI, 19 maiu 2020 (TATOLI) – Prezidente Autoridade Rejiaun Administrativa Espesiál Óe-cusse Ambeno (RAEOA) no Zona Ekonomia Espesiál Sosiál Merkadu Timor-Leste (ZEESM-TL), José Luís Guterres ‘Lugu’ rejeita krítika sira ne’ebé maihusi Sosiedade Sivíl iha Oé-cusse katak hafoin simu kna’ar nu’udar Prezidente Autoridade, nia la halo servisu Óe-cusse.

Maski nune’e, eis diplomata timor-oan ne’e apresia no enkoraja liberdade espresaun tanba nia konsidera ema hotu iha liberdade atu krítika maibé presiza hato’o krítika ne’ebé fundamentál.

“Ha’u apresia no enkoraja liberdade espresaun, tanba ita luta durante tinan barak atu konkista liberdade espresaun no liberdade krítika ba dirijente inklui ba ema tomak, maibé husu mak krítika sira ne’e tenke iha fundamentu, tanba bainhira klaiha fundamentu maka ita rasik sei hatuun ita nia-an. Alin sira ne’ebé halo krítika ne’e ami hamutuk tuur diskute hodi fó apoia ba hirak ne’ebé presiza hanesan ba igreja no populasaun kbi’it laek. Krítika dehan ha’u la ba Oé-cusse ne’e laloos”, hateten Prezidente Autoridade ne’e hafoin reuniaun ho Primeiru-Ministru (PM), Taur Matan Ruak iha Palásiu Governu, tersa ne’e.

Notísia Relevante: Prezidente Autoridade RAEOA Vizita Labarik 103 iha Orfanatu Topu Honis

Lugu fó sasin katak, nia halo ona vizita ba fatin barak iha Oé-cusse.

“Ha’u ba vizita Orfanatu Topu Honis, Suku Malelat, inklui distritu haat iha Oé-cusse, ne’ebé atu dehan ha’u laiha ne’ebá ne’e laloos no tuir lei ZEESM nian, ha’u bele hela iha kualkér parte iha territóriu nasionál, bele iha Maliana, Suai, no Oé-cusse rasik,. Ha’u ba iha ne’ebá tanba nesesidade halo servisu no semana oin mai ha’u sei halo reuniaun ho Xefe Suku na’in-18 iha rai Oé-Cusse”, Lugu esklarese.

Nia adianta, dala-barak nia parte ba vizita Oé Cusse hodi ba vizita suku sira hanesan Suku Malelat.

“Suku ne’e hori-uluk ema la bá ida, tanba suku ne’e dook nune’e mós Orfanatu Topu Honis. Ha’u ba vizita fatin barak hanesan Passabe no Citrana hodi haree estrada sira no ba vizita mós Oé-silo. Ha’u atu dehan povu presiza bee-moos tanba ita husu atu povu fase liman, maibé bee iha Sentru Saúde de’it laiha, inklui eskola no merkadu, maibé ami halo ona esforsu tau bee iha merkadu hodi belw kumpre regra ba prevensaun surtu COVID-19”, nia akresenta.

Eis Ministru Negósiu Estranjeiru no Kooperasaun ne’e konsidera mós katak entidade sé de’it bele hato’o krítika konforme ema ne’e nia hakarak, maibé presiza haree didi’ak.

“Ha’u ema ida ne’ebé defende demokrasia no liberdade iha ita nia rai-laran no ha’u respeitu opiniaun sira hotu maski opiniaun sira ne’e kontra ha’u, maibé ha’u husu de’it katak pelu menus haree ba lia ne’e loos ka laloos”, nia subliña.

Jornalista: Antónia Gusmão

Editora: Julia Chatarina

1 KOMENTÁRIU

  1. ne’e mak dehan waooo dehan PA….Oekusi oan refere “manu oan lakon sira nia inan”…nai bainhira los maka valorize oekusi oan sira !!!

HAKEREK NO HATÁN

Please enter your comment!
Please enter your name here