PNTL halao hela seguransa iha Resintu PN, Segunda (18/05/2020). Imasjen/Antonio Goncalves

DILI, 19 maiu 2020 (TATOLI) – Komandu Polísia Nasionál Timor-Leste (PNTL) Munisípiu Dili, koloka membru na’in-500-resin  hodi fó seguransa iha resintu Parlamentu Nasionál durante loron rua; segunda-tersa (18-19/05/2020).

PNTL hola medida fó seguransa másima no blokeia mós asesu estrada iha Parlamentu Nasionál nia oin to’o iha Eskola Liseu nian atu evita provokasaun husi li’ur durante diskusaun polítika ba pedidu destituisaun hasoru Prezidente Parlamentu Nasionál  (PPN), Arão Noé de Jesus da Costa Amaral.

Iha portaun resintu Parlamentu Nasionál nian mós seguransa estra-ordináriu hodi la autoriza sidadaun baibain asesu ba PN. Exeptu funsionáriu PN ho jornalista destakadu sira iha PN.

Komandante PNTL Munisípiu Dili, Superintendente Xefe Armando Monteiro. Imajen/Antonio Goncalves

“Durante loron rua; segunda to’o tersa ne’e, ami koloka membru na’in-500-resin hodi asegura másima resintu PN,” informa Komandante PNTL Munisípiu Dili, Superintendente Xefe Armando Monteiro, hodi responde Ajénsia Tatoli iha resintu PN.

Armando Monteiro klarifika, prezensa polísia nian durante loron rua hodi asegura seguransa másima, hodi nune’e, órgaun soberanu  Parlamentu Nasionál foku ba hala’o diskusaun sira-nia ajenda serbisu.

“Grupu ka ema seluk husi li’ur labele aproveita tama halo impedimentu ka perturbasaun ba desizaun ruma iha PN,” afirma Superintendente Xefe Armando Monteiro.

Komandu Munisípiu Dili mós hetan apoiu husi Unidade Polísia Marítima (UPM), Batallaun Orden Públika (BOP), Korpu Seguransa Pesoál (CSP) ne’ebé destaka iha PN.

“Ami mós hala’o patrullamentu iha area Dili laran hodi asegura nafatin seguransa, maibé simplesmente maturidade povu nian aas tebes mezmu ho tensaun polítika ne’ebé aas durante loron hirak ne’e, mas povu kontinua hakmatek hala’o nia atividade iha uma no iha sira ida-idak nia serbisu fatin,” Armando Monteiro hateten.

Nia mós apelu ba populasaun hotu atu mantén pás hodi kontinua halo prevensaun ba propagasaun surtu Coronavirus ka COVID-19  no kona-ba situasaun polítika husik ba polítiku na’in sira rezolve.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here