Prezidente Autoridade RAEOA-ZEESM,TL sesante, José Luís Guterres ‘Lugu’. Imajen Tatoli/Egas Cristovão

DILI, 19 maiu 2020 (TATOLI) – Prezidente Autoridade Rejiaun Administrativa Espesiál Óe-cusse Ambeno (RAEOA) no Zona Ekonomia Espesiál Sosiál Merkadu Timor-Leste (ZEESM-TL), José Luis Guterres ‘Lugu’ konsidera membru Parlamentu Nasionál (PN) ne’ebé hanesan Reprezentante Povu hatudu imajen ladi’ak ba Mundu.

Tuir Lugu, imajen ne’ebé membru PN sira hatudu sei fó impaktu ladi’ak atu investór sira mai investe iha Timor-Leste.

Nia hato’o lia hirak ne’e hafoin asiste, deputadu sira haksesuk malu iha sala plenáriu ba ajenda no debate distituisaun Prezidente Parlamentu Nasionál, Arão Noé de Jesus da Costa Amaral.

“Ha’u kontente oituan maibé triste mós barak, triste tanba ha’u haree ita-nia deputadu sira iha Parlamentu, maski la baku-malu maibé bele fó imajen ladi’ak ba komunidade internasionál. Ha’u akompaña situasaun iha Parlamentu desde horisehik laiha violénsia maski ko’alia hakilar. Hein katak labele iha violénsia iha ita-nia rai-laran tanba bainhira sai iha mídia sosiál ne’e bele fó imajen ladi’ak no difísil atu atrai investór hodi mai halo investimentu iha Timór”, dehan  Prezidenti Autoridade RAEOA, hafoin reuniaun ho Primeiru-Ministru, Taur Matan Ruak iha Palásiu Governu, tersa ne’e.

Notísia Relevante: Deputadu CNRT Baku-Fila Meza Prezidente Parlamentu Nasionál

Maski nune’e, eis governante ne’e iha esperansa katak polítiku jerasaun foun sira bele halo esforsu atu ko’alia ba-malu atu ajuda rezolve problema sira hanesan mós partidu polítiku sira iha responsabilidade atu garante dame no estabilidade ba povu.

“Diferénsia polítika ne’e normál, ha’u atu dehan katak prinsipálmente iha Óe-cusse ami presiza kria estabilidade polítika sosiál ne’ebé ami konta ho partidu polítiku sira hotu ne’ebé iha reprezentante iha Parlamentu, nune’e mós sira ne’ebé laiha reprezentante iha Parlamentu, Organizasaun Sosiedade Sivíl, Igreja, no Autoridade Komunitáriu sira tanba presiza konta ho sira hotu atu kria estabilidade sosiál iha polítika atubele garante katak fatin ne’e ema bele mai halo investimentu”, dehan Lugu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here