Prezidente Autoridade RAEOA-ZEESM TL, José Luís Guterres ‘Lugu’. Imajen Tatoli/Egas Cristovão

DILI, 19 maiu 2020 (TATOLI)Prezidente Autoridade Rejiaun Administrativa Espesial Óe-cusse Ambeno (RAEOA) no Zona Ekonomia Espesiál Sosiál Merkadu Timor-Leste (ZEESM-TL), José Luís Guterres ‘Lugu’, deklara katak ema ne’ebé asume kargu nu’udar Sekretáriu Rejionál maioria Oé-cusse oan rasik.

Tuir Lugu, ho mudansa situasaun polítika ne’ebé la’o daudaun maka sei halo esforsu hodi eskolla ema sira ne’ebé sei asume kargu refere presiza refleta mós ba kompozisaun partidária ne’ebé eziste iha Oé-cusse rasik.

“Ha’u nia kompromisu ba povu Oé-cusse katak ema sira ne’ebé sei assume kna’ar nu’udar Sekretáriu Rejionál maioria maihusi rai Oé-cusse, to’o agora estrutura administrasaun públika ne’ebé hori-uluk iha rai Oé-cusse to’o agora seidauk muda ida, ba iha ema ida de’it no diretór ida, maibé tanba nia la kumpre orientasaun hosi Organizasaun Mundiál Saúde kona-ba tempu kuarentena, maka ha’u hasai nia tanba nia haruka ema ne’ebé iha kuarentena foin loron lima de’it ba ona uma. Ne’e fó risku saúde iha ita-nia rain, maibé nomea fali ema Oé-cusse ida ona ne’ebé halo servisu di’ak tebes”, hateten Prezidente RAEOA, hafoin reuniaun ho Primeiru-Ministru, Taur Matan Ruak iha Palásiu Governu, tersa ne’e.

Lugu kompromete mós katak semana oin sei realiza reuniaun ho autoridade lokál sira husi suku 18 iha RAEOA hodi rona opiniaun ba interese rejiaun ne’e nian.

“Ha’u respeita opiniaun hotu, mesmu krítika ba ha’u rasik maibé tenke krítika ho fundamentu no ko’alia tanba atu ajuda rezolve. Ida ne’e maka prinsípiu ha’u nian no ha’u laiha pozisaun ida hateten ema a’at maibé hakarak loloos ne’e mak ekipa ha’u nia bá Oé-cusse tanba ami ninia prezensa iha ne’ebá atu serví povu Oé-cusse ne’ebé la haree ba partidu, ferik no katuas nune’e mós joven sira ne’ebé halo krítika”, Lugu subliña.

Jornalista: Antónia Gusmão

Editora: Julia Chatarina

1 KOMENTÁRIU

  1. Promete ba….labele koalia deit ..ami persija realiza…nomos favor publika ema sira ne’e hodi publiku hatene…mos espera katak Por Meritu …laos tan deit aviliasaun partidu kargu intrega deit…@@@

HAKEREK NO HATÁN

Please enter your comment!
Please enter your name here