Prezidente Autoridade RAEOA-ZEESM TL, José Luís Guterres ‘Lugu’. Imajen Tatoli/Egas Cristovão

DILI, 19 maiu 2020 (TATOLI) – Prezidente Autoridade Rejiaun Administrativa Espesiál Óe-Cusse Ambeno (RAEOA) no Zona Ekonomia Espesiál Sosiál Merkadu Timor-Leste (ZEESM-TL), José Luís Guterres ‘Lugu’, iha tersa dader ne’e hasoru malu ho Primeiru-Ministru (PM), Taur Matan Ruak hodi atualiza progresu prevensaun surtu COVID-19 no seguransa jerál iha Oé-cusse.

“Primeiru-Ministru hakarak hatene situasaun COVID-19 no mós situasaun seguransa jerál iha rai Óe-Cusse. Ha’u informa kona-ba ema ne’ebé tama kuarentena hamutuk 159 maibé na’in-153 kumpre ona loron 14 no daudaun ne’e na’in-neen de’it maka hela iha kuarentena”, dehan Prezidente Autoridade ne’e hafoin reuniaun ho Xefe Governu iha Palásiu Governu.

Tuir Lugu, na’in-neen ne’e tolu tama husi Passabe no tolu seluk husi Oé-silo, no na’in hira ne’e tama liu dala ilegál iha loron-tolu liubá.

“Ami kumpre norma hotu ne’ebé estabelese husi Organizasaun Mundiál Saúde no mós Ministériu Saúde hodi halo prevensaun ba surtu iha ita-nia rai laran”, nia karesenta.

Biban ne’e, Prezidente Autoridade ne’e mós informa servisu ne’ebé maka hala’o hosi Prezidente Brigada Soke iha RAEOA, Nelson Martins.

“Nia (Nelson Martins) foin halo vizita no nia maka prezide ekipa ne’ebé partisipa hosi Polísia, sosiedade sivíl, médiku sira, no ema barak maka partisipa. Ami mós halo ona proposta orsamentu ba COVID-19 nia tanba presiza prepara-an. Ida-ne’e infrenta karik hanesan iha fatin seluk iha mundu hanesan Estadu Unidu Amérika (EUA) no ita-nia viziñu Indonézia ne’ebé iha Óe-Cusse ami presiza reforma medida seguransa metin”, dehan Lugu.

Servisu hamutuk ne’ebé autoridade sira halo mak servisu hamutuk ho autoridade seguransa, hanesan Polísia Fronteira no Polísia Marítima, no autoridade lokál hodi garante seguransa ba sidadaun sira ne’ebé karik tama ilegál entaun tenke submete ba iha kuarentena hodi kumpre medida sira hotu.

“Ha’u hakarak felisita ekipa lidera prosesu prevensaun Coronavírus tanba ho sira-nia servisu maka’as maka to’o agora ita seidauk rejista ema mate tanba COVID-19, signifika katak medida sira ne’ebé ita toma to’o ohin loron”, Lugu salienta.

Jornalista: Antónia Gusmão

Editora: Julia Chatarina

 

HAKEREK NO HATÁN

Please enter your comment!
Please enter your name here